Vendime të miratuara në mbledhjen e Këshillit të Ministrave, datë 16 Korrik 2025:
V E N D I M
PËR
PËRCAKTIMIN E AFATEVE TË TESTIMIT FILLESTAR, INTERVALEVE TË TESTIMIT PERIODIK, SI DHE TË PROCEDURËS SË PROVIMIT E TË KRITEREVE TË VLERËSIMIT
Në mbështetje të nenit 100 të Kushtetutës dhe të pikës 3, të nenit 23, të ligjit nr.99/2024, “Për inspektimin në Republikën e Shqipërisë”, me propozimin e ministrit të Shtetit për Sipërmarrjen dhe Klimën e Biznesit, Këshilli i Ministrave
V E N D O S I:
KREU I
DISPOZITA TË PËRGJITHSHME
1. Ky vendim përcakton afatet për zhvillimin e testimit fillestar dhe intervalet e testimit periodik, rregullat për realizimin e procedurës së testimit fillestar dhe periodik të inspektorit, si dhe kriteret e vlerësimit të provimit.
2. Ky vendim synon të sigurojë standardizimin, transparencën dhe objektivitetin e procesit të testimit, duke garantuar që inspektorët të kenë njohuritë, aftësitë dhe integritetin e nevojshëm për ushtrimin e funksionit të tyre, me qëllim përmirësimin e cilësisë dhe efektivitetit të veprimtarisë inspektuese.
3. Në këtë vendim, termat e mëposhtëm kanë këto kuptime:
a) “Testimi fillestar”, procesi i vlerësimit të njohurive dhe aftësive të inspektorit, që ndodhet në kohë prove, i cili zhvillohet në përfundim të trajnimit të detyrueshëm, me qëllim verifikimin e përgatitjes së tij profesionale për ushtrimin e funksionit inspektues;
b) “Testimi periodik”, procesi i vlerësimit të njohurive, që i nënshtrohet inspektori, në intervale të përcaktuara kohore, me qëllim verifikimin e përditësimin e njohurive, aftësive dhe kompetencave profesionale, në përputhje me zhvillimet ligjore, institucionale dhe praktikat më të mira të inspektimit;
c) “Inspektor”, nëpunësi që ushtron funksione inspektimi në inspektoratet qendrore, në strukturat e tjera inspektuese ose në Inspektoratin e Përgjithshëm, në pozicionet “inspektor”, “përgjegjës sektori”, “drejtor drejtorie” ose “kryeinspektor i drejtorisë rajonale”;
ç) “Inspektor në kohë prove”, nëpunësi që është emëruar për herë të parë në një drejtori qendrore ose rajonale të inspektoratit qendror, strukturat e tjera inspektuese ose në Inspektoratin e Përgjithshëm, i cili i
nënshtrohet kohës së provës, që zgjat 3 (tre) muaj nga data e lidhjes së kontratës së punës;
d) “Strukturat e tjera inspektuese”, struktura që kryejnë funksione inspektimi në juridiksionin e pushtetit ekzekutiv të qeverisjes qendrore dhe që janë në fushën e zbatimit të ligjit nr.99/2024, “Për inspektimin në
Republikën e Shqipërisë”, por nuk janë të organizuara si inspektorate
qendrore.
4. Testimi profesional fillestar e periodik organizohet nga Inspektorati i Përgjithshëm.
5. Testimi fillestar dhe periodik i inspektorit dhe inspektorit në kohë prove realizohet nga komisioni i rekrutimit dhe ecurisë në karrierë (në vijim, KREK).
6. Testimi profesional fillestar bëhet në bazë të një testimi me shkrim dhe me gojë për inspektorin në kohë prove, ndërsa testimi periodik bëhet vetëm në bazë të testimit me shkrim.
7. Procedurës së testimit fillestar i nënshtrohet vetëm inspektori në kohë prove në Inspektoratin e Përgjithshëm dhe në inspektoratin qendror, në përfundim të trajnimit të detyrueshëm.
8. Procedurës së testimit periodik i nënshtrohet:
a) inspektori i konfirmuar, përgjegjësi i sektorit, drejtori i drejtorisë në inspektoratet qendrore, strukturat e tjera inspektuese dhe në Inspektoratin e Përgjithshëm;
b) kryeinspektori i drejtorisë rajonale në inspektoratin qendror.
9. Moskalimi i testimit fillestar në përfundim të kohës së provës shkakton moskonfirmimin në fund të kohës së provës për pozicionin “inspektor”.
10. Moskalimi i testimit periodik, për shkaqe që varen nga vetë inspektori, sjell largimin nga detyra të inspektorit.
KREU II
TESTIMI FILLESTAR
1. Inspektori në kohë prove i nënshtrohet procedurës së testimit fillestar në jo më pak se 15 (pesëmbëdhjetë) ditë pune, pas përfundimit të trajnimit të detyrueshëm, sipas kritereve të përcaktuara në këtë vendim.
2. Inspektorati i Përgjithshëm, brenda 5 (pesë) ditëve punë nga data e lidhjes së kontratës të inspektorit në kohë prove për zhvillimin e trajnimit të detyrueshëm, njofton inspektorin dhe strukturën përgjegjëse të inspektoratit qendror, nëpërmjet njoftimit elektronik.
3. Trajnimi i detyrueshëm duhet të kryhet brenda 25 (njëzet e pesë) ditëve punë nga data e lidhjes së kontratës të inspektorit në kohë prove.
4. Inspektorati i Përgjithshëm përcakton datën e testimit fillestar dhe njofton inspektorin nëpërmjet njoftimit elektronik dhe njësinë e burimeve njerëzore përkatëse, të paktën 10 (dhjetë) ditë pune përpara datës së përcaktuar për zhvillimin e testimit.
5. KREK-u përzgjedh nga banka e pyetjeve pyetjet për testimin me shkrim dhe me gojë, bazuar në fushën e njohurive për të cilat do të zhvillohet testimi, sipas rregullave të përcaktuara për metodologjinë e testimit.
6. Sistemi i vlerësimit bazohet në testimin me shkrim dhe me gojë, me 100 pikë, nga të cilat 70 pikë për testimin me shkrim dhe 30 pikë për testimin me gojë.
7. KREK-u, brenda 10 (dhjetë) ditëve punë nga realizimi i testimit, nxjerr rezultatet e testimit me shkrim e me gojë.
8. Inspektorati i Përgjithshëm njofton inspektorin nëpërmjet njoftimit elektronik dhe inspektoratin qendror për rezultatin e testimit, sipas këtij pikëzimi:
a) 90 – 100 pikë, “shkëlqyeshëm”;
b) 76 – 89 pikë, “shumë mirë”;
c) 61 – 75 pikë, “mirë”;
ç) 51 – 60 pikë, “kënaqshëm”;
d) 0 – 50 pikë, “jokënaqshëm”.
9. Inspektori që është vlerësuar “shkëlqyeshëm”, “shumë mirë” dhe “mirë” konsiderohet i përshtatshëm për pozicionin e punës, ku është emëruar dhe konfirmohet në pozicionin “inspektor”.
10. Inspektori që është vlerësuar “kënaqshëm” konsiderohet i përshtatshëm për pozicionin e punës, ku është emëruar dhe konfirmohet në pozicionin “inspektor”, me kushtin që të ndjekë programe trajnimi të vazhdueshme, të cilat synojnë plotësimin e dobësive, që ka shfaqur gjatë kësaj procedure.
11. Inspektori që është vlerësuar “jokënaqshëm” konsiderohet jo i përshtatshëm për pozicionin e punës, ku është emëruar dhe nuk konfirmohet në pozicionin “inspektor”.
12. Mosparaqitja e inspektorit në testimin fillestar, pa shkaqe të arsyeshme, sjell moskonfirmimin në pozicionin “inspektor” në fund të kohës së provës.
13. Në kuptim të pikës 12 të këtij kreu, shkaqe të arsyeshme konsiderohen rastet e mëposhtme:
a) Martesa e inspektorit, paraardhësit apo pasardhësit të tij;
b) Lindja e fëmijës për baballarët;
c) Vdekja e prindërve, e gjyshërve, e bashkëshortit, e bashkëjetuesit, e fëmijës, e vëllezërve, e motrave apo e anëtarëve të tjerë të familjes;
ç) Sëmundja e rëndë e vetë inspektorit, e fëmijës, e prindërve, e bashkëshortit apo e anëtarëve të tjerë të familjes, vërtetuar me raport mjekësor apo në rast përkujdesjeje për fëmijën në ngarkim.
14. Në rast të mosparaqitjes në testimin fillestar, për një nga shkaqet e arsyeshme në pikën 13 të këtij kreu, inspektori do t’i nënshtrohet procedurës së testimit fillestar, brenda 5 (pesë) ditëve punë nga data e rikthimit në punë. Në këtë rast nuk zbatohet afati për njoftimin e testimit, sipas përcaktimeve në pikën 4 të këtij kreu.
KREU III
TESTIMI PERIODIK
1. Intervali i testimit periodik për inspektorin është çdo 4 (katër) vjet, sipas procedurave dhe kritereve përkatëse të vlerësimit, të parashikuara në këtë vendim.
2. Inspektorati i Përgjithshëm njofton inspektorin dhe strukturën përgjegjëse të inspektoratit qendror, nëpërmjet njoftimit elektronik, 30 (tridhjetë) ditë pune përpara datës së parashikuar për zhvillimin e testimit periodik.
3. Testimi periodik për inspektorin zhvillohet vetëm me shkrim.
4. KREK-u përzgjedh pyetjet e testimit me shkrim nga banka e pyetjeve për testimin periodik, e cila hartohet nga Inspektorati i Përgjithshëm, sipas fushave përkatëse të inspektimit.
5. KREK-u, brenda 10 (dhjetë) ditëve punë nga realizimi i testimit periodik, nxjerr rezultatet, sipas pikëzimit të përcaktuar në pikën 8, të kreut II, të këtij vendimi.
6. Në fund të testimit periodik, inspektori, që, në bazë të rezultateve të vlerësimit, është vlerësuar:
a) shkëlqyeshëm”, “shumë mirë”, “mirë” ose “kënaqshëm”, konsiderohet se përmbush kërkesat për vazhdimësinë në detyrë;
b) “jokënaqshëm”, konsiderohet se nuk përmbush kërkesat për vazhdimësinë në detyrë dhe largohet nga detyra.
7. Mosparaqitja e inspektorit në testimin periodik, pa shkaqe të arsyeshme, konsiderohet shkelje dhe përbën shkak për dhënien e masës disiplinore.
8. Në kuptim të pikës 7 të këtij kreu, shkaqe të arsyeshme konsiderohen shkaqet e përmendura në pikën 13, të kreut II, të këtij vendimi, dhe në këtë rast inspektori i nënshtrohet testimit brenda 6 (gjashtë) muajve nga rikthimi në punë.
9. Procedurës së testimit periodik nuk i nënshtrohen inspektorët, të cilët janë në 5 (pesë) – vjeçarin e fundit, para daljes në pension.
KREU IV
ORGANIZIMI I TESTIMIT FILLESTAR DHE PERIODIK
1. Testimi garanton uniformitet në vlerësimin profesional të inspektorit, në nivel kombëtar, përmes verifikimit të aftësive të nevojshme profesionale, sipas specifikave të çdo fushe inspektimi.
2. Përmbajtja e testimit përfshin legjislacionin në fuqi për inspektimin në Republikën e Shqipërisë, procedurat administrative, kundërvajtjet administrative, konfliktin e interesit, kodin e etikës, mbrojtjen e të dhënave personale, si dhe aktet ligjore e nënligjore sektoriale për çdo strukturë përgjegjëse inspektimi.
3. Inspektorati i Përgjithshëm, në bashkëpunim me inspektoratin qendror, sipas fushës së inspektimit, harton dhe përditëson bankën e pyetjeve për testimin fillestar e periodik, në përputhje me parashikimin e pikës 2 të këtij kreu.
4. Inspektorati i Përgjithshëm përcakton kalendarin e zhvillimit të testimit periodik, fushat e legjislacionit, të cilat kanë pësuar ndryshime, si dhe të gjitha ndryshimet përkatëse.
5. Inspektorati i Përgjithshëm, në bashkëpunim me strukturën përgjegjëse për burimet njerëzore në inspektoratet qendrore, harton listën e inspektorëve që do të marrin pjesë në testimin fillestar e periodik dhe e shpall listën e inspektorëve në faqen zyrtare të inspektoratit qendror.
6. Mënyra e zhvillimit dhe administrimit të testimit bëhet sipas rregullave të përcaktuara në metodologjinë për testimin, të miratuar nga Inspektori i Përgjithshëm.
7. Inspektorati i Përgjithshëm, për zhvillimin e testimit:
a) harton modulet e trajnimit e të testimit dhe i publikon on-line;
b) harton kalendarin dhe publikon listat e inspektorëve, sipas datës së testimit;
c) mban e administron të gjitha dhënat për procesin e testimit në sistemin “e-Inspektimi”;
ç) verifikon identitetin e kandidatëve pjesëmarrës në vendin e testimit;
d) siguron kushte të përshtatshme në vendin e testimit për zhvillimin e testimit;
dh) publikon në faqen zyrtare rezultatet e testimit dhe ia njofton ato dhe inspektoratit qendror.
KREU V
VLERËSIMI I TESTIT
1. KREK-u shpall skemën e vlerësimit të testit me shkrim e me gojë përpara fillimit të testimit, përfshirë pikët për secilën pyetje dhe raportin midis komponentëve të testimit, sipas legjislacionit bazë dhe atij sektorial.
2. Vlerësimi i përgjigjeve të inspektorit bëhet me pikë, si për testimin me shkrim, ashtu edhe për testimin me gojë.
3. KREK-u vlerëson me pikë inspektorin gjatë testimit me gojë për përgjigjen e secilës pyetje, duke u bazuar në:
a) njohuritë profesionale;
b) qartësinë e të shprehurit;
c) logjikën e argumentimit;
ç) zbatueshmërinë praktike të përgjigjeve;
d) sjelljen etike dhe komunikimin.
4. Për vlerësimin e përgjigjeve të testimit me gojë, secili prej anëtarëve të KREK-ut jep pikët e tij. Në përfundim, pikët mblidhen dhe më pas nxirret mesatarja e përgjithshme, e cila përbën edhe vlerësimin përfundimtar të inspektorit.
5. Përpara fillimit të vlerësimit të testimit me shkrim, anëtarët e KREK-ut orientohen për vlerësimin e njëjtë të testeve, sipas skemës përkatëse të vlerësimit.
6. Çdo anëtar i KREK-ut nënshkruan testin me shkrim, që vlerëson dhe mban përgjegjësi për vlerësimin që bën.
7. Vlerësimi i testit bëhet në mjedise të përshtatshme dhe të sigurta, të përcaktuara nga Inspektorati i Përgjithshëm.
8. Çdo përgjigje e testit i nënshtrohet një vlerësimi të pavarur nga të gjithë anëtarët e KREK-ut.
9. Vlerësuesit nuk mund të bëjnë shënime në testin me shkrim. Vlerësimet me pikë për çdo pyetje të testit me shkrim pasqyrohen në formularët përkatës.
10. Për vlerësimin përfundimtar, pikët për çdo pyetje të testit pasqyrohen në tabelën përmbledhëse dhe nënshkruhen nga të gjithë anëtarët e KREK-ut.
KREU VI
KARTA E INSPEKTORIT DHE CERTIFIKIMI NË PËRFUNDIM TË TESTIMIT
1. Pas kalimit me sukses të testimit fillestar, inspektori i konfirmuar pajiset me kartën e inspektorit.
2. Karta e inspektorit qendror lëshohet nga inspektori i Përgjithshëm.
3. Karta përmban emrin dhe mbiemrin e inspektorit, fotografinë e 2 (dy) viteve të fundit të inspektorit, numrin unik identifikues, datën e lëshimit dhe të skadimit të kartës, fushën e inspektimit ose specializimin, si dhe elemente të sigurisë për të parandaluar falsifikimin.
4. Karta e inspektorit prezantohet nga inspektorët gjatë ushtrimit të detyrës për të verifikuar identitetin dhe autoritetin e tyre.
5. Karta rinovohet menjëherë pas ndryshimeve të të dhënave personale ose profesionale të inspektorit.
6. Karta anulohet, nëse inspektori lirohet nga detyra apo nëse inspektorit i hiqet e drejta e ushtrimit të detyrës për shkak të shkeljeve ligjore ose masave disiplinore dhe dorëzohet menjëherë nga inspektori pranë njësisë së burimeve njerëzore të inspektoratit, ku ka emërimin. Njësia e burimeve njerëzore e përcjell me shkresë zyrtare pranë Inspektoratit të Përgjithshëm brenda 2 (dy) ditëve punë, si dhe e pasqyron anulimin në sistemin elektronik “e-Inspektimi”.
7. Në përfundim të trajnimit e të testimit, inspektori pajiset me certifikatën e trajnimit dhe të testimit, e cila lëshohet për të vërtetuar përfundimin e programeve të trajnimit të njohura nga Inspektorati i Përgjithshëm dhe testimit të njohurive të përfituara nga këto trajnime.
8. Certifikata përmban emrin dhe mbiemrin e inspektorit, datën e fillimit e të përfundimit të trajnimit, përshkrimin e qartë të temës ose aftësive të fituara, datën e zhvillimit të testimit dhe rezultateve të tij, nënshkrimin e inspektorit të Përgjithshëm dhe vulën e Inspektoratit të Përgjithshëm.
9. Certifikata dëshmon për kompetencat dhe aftësitë specifike të inspektorit, duke siguruar që të gjithë inspektorët u përmbahen standardeve të larta profesionale dhe etike të kërkuara për ushtrimin e funksioneve të tyre.
KREU VII
ANKIMI
1. Inspektori, që i nënshtrohet testimit fillestar ose periodik, ka të drejtë të verifikojë përgjigjet e dhëna dhe të ankimojë, nëse ka kontestime për rezultatin. Inspektori paraqet ankimin pranë Inspektoratit të Përgjithshëm brenda 5 (pesë) ditëve punë nga njoftimi i rezultateve.
2. Inspektorati i Përgjithshëm, nëpërmjet një komisioni ad-hoc, që ngrihet me urdhër të Inspektorit të Përgjithshëm, shqyrton ankimin dhe i njofton vendimin e arsyetuar inspektorit, që ka paraqitur ankimin, brenda 5 (pesë) ditëve punë nga përfundimi i afatit të ankimit.
3. Vendimi i komisionit ad-hoc është vendim përfundimtar dhe mund të ankimohet në gjykatën administrative kompetente, brenda 45 (dyzet e pesë) ditëve nga marrja dijeni.
KREU VIII
DISPOZITA KALIMTARE DHE TË FUNDIT
1. Inspektorët aktualë në detyrë, të cilët nuk janë testuar për përfitimin dhe përditësimin e njohurive shtesë prej më shumë se 4 (katër) vitesh, i nënshtrohen testimit të parë periodik, që do të fillojë të kryhet brenda 1 (një) viti nga hyrja në fuqi e këtij vendimi.
2. Inspektorët, të cilëve u ka përfunduar periudha e provës përpara hyrjes në fuqi të ligjit nr.99/2024, “Për inspektimin në Republikën e Shqipërisë”, dhe të këtij vendimi, nuk i nënshtrohen procedurës së testimit fillestar për konfirmimin në pozicionin e inspektorit.
3. Parashikimi i bërë në pikën 2 të këtij kreu zbatohet për inspektorët, marrëdhënia e punës së të cilëve rregullohet nga dispozitat e Kodit të Punës apo nga legjislacioni për nëpunësin civil.
4. Ngarkohen Inspektorati i Përgjithshëm, inspektoratet qendrore dhe strukturat e tjera inspektuese për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
AUTORIZIMIN E MINISTRIT PËRGJEGJËS PËR ÇËSHTJET VENDORE PËR NEGOCIIMIN DHE NËNSHKRIMIN E MARRËVESHJES ME NJËSITË E VETËQEVERISJES VENDORE PËR KRIJIMIN E PERSONIT JURIDIK SI SUBJEKT I KOMPETENCAVE TË PËRBASHKËTA ME VETËQEVERISJEN VENDORE PËR RRITJEN E KAPACITETEVE TË QEVERISJES VENDORE TË REPUBLIKËS SË SHQIPËRISË
Në mbështetje të nenit 100 të Kushtetutës dhe të pikës 5, të nenit 14, të ligjit nr.139/2015, “Për vetëqeverisjen vendore”, të ndryshuar, me propozimin e ministrit të Shtetit për Pushtetin Vendor, Këshilli i Ministrave
V E N D O S I:
1. Autorizimin e ministrit përgjegjës për çështjet vendore për negociimin dhe nënshkrimin e marrëveshjes me njësitë e vetëqeverisjes vendore, sipas pikës 5, të nenit 14, të ligjit nr.139/2015, “Për vetëqeverisjen vendore”, të ndryshuar, për krijimin e subjektit të kompetencave të përbashkëta, në formën e organizatës jofitimprurëse, për zhvillimin e kualifikimin profesional të qëndrueshëm të të zgjedhurve, nëpunësve civilë dhe punonjësve të tjerë në njësitë e vetëqeverisjes vendore, me qëllim rritjen e performancës profesionale për t’u shërbyer komuniteteve dhe për t’i ndihmuar ato në përmbushjen e funksioneve të veta dhe kompetencave, sipas legjislacionit në fuqi, si dhe për përmbushjen e sfidave, që lidhen me procesin e integrimit në Bashkimin Evropian.
2. Ndihmesa financiare konsiston në mbulimin e kostos fillestare të themelimit të subjektit të kompetencave të përbashkëta dhe të jo më pak se 50% të kostove operacionale të funksionimit të saj për tri vitet e para të funksionimit për përmbushjen e objektivave.
3. Ministri përgjegjës për çështjet vendore merr pjesë në komitetin drejtues të subjektit të kompetencave të përbashkëta.
4. Ndihmesa financiare, sipas pikës 2 të këtij vendimi, të parashikohet në buxhetin e Agjencisë për Mbështetjen e Vetëqeverisjes Vendore.
5. Ministri përgjegjës për çështjet vendore sigurohet që, për programet e ofruara, të merret pëlqimi paraprak nga Shkolla Shqiptare e Administratës Publike për miratimin e programit vjetor të trajnimit, pa penguar zhvillimin e realizimin e tij, me përjashtim të rastit kur për module përkatëse vërtetohet se është kryer planifikimi për vitin akademik përkatës nga ana e Shkollës Shqiptare të Administratës Publike.
6. Ngarkohen ministri përgjegjës për çështjet vendore, Ministria e Financave dhe Agjencia për Mbështetjen e Vetëqeverisjes Vendore për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E MASËS SË FINANCIMIT NË BUXHETIN E VITIT 2025 PËR BASHKËSITË FETARE, QË KANË NËNSHKRUAR MARRËVESHJE ME KËSHILLIN E MINISTRAVE
Në mbështetje të nenit 100 të Kushtetutës, të neneve 2, 3, 4, 5 e 6, të ligjit nr.10140, datë 15.5.2009, “Për financimin, nga buxheti i shtetit, të bashkësive fetare, që kanë nënshkruar marrëveshje me Këshillin e Ministrave”, dhe të ligjit nr.115/2024, “Për buxhetin e vitit 2025”, të ndryshuar, me propozimin e Kryeministrit, Këshilli i Ministrave
V E N D O S I:
1. Masa e financimit, prej 113 000 000 (njëqind e trembëdhjetë milionë) lekësh, nga buxheti i vitit 2025, e miratuar për të mbështetur financiarisht bashkësitë fetare, përdoret, si më poshtë vijon:
a) Komuniteti Mysliman i Shqipërisë përfiton shumën 33 840 000 (tridhjetë e tre milionë e tetëqind e dyzet mijë) lekë, të ndarë në:
i. 17 040 000 (shtatëmbëdhjetë milionë e dyzet mijë) lekë për financimin me gjysmën e pagës minimale buxhetore për 71 (shtatëdhjetë e një) punonjës të administratës;
ii. 16 800 000 (gjashtëmbëdhjetë milionë e tetëqind mijë) lekë për financimin me gjysmën e pagës minimale buxhetore për 70 (shtatëdhjetë) punonjës të institucioneve të arsimit parashkollor, parauniversitar dhe universitar.
b) Kisha Ortodokse Autoqefale e Shqipërisë përfiton shumën 26 400 000 (njëzet e gjashtë milionë e katërqind e mijë) lekë, të ndarë në:
i. 13 200 000 (trembëdhjetë milionë e dyqind mijë) lekë për financimin me gjysmën e pagës minimale buxhetore për 55 (pesëdhjetë e pesë) punonjës të administratës;
ii. 13 200 000 (trembëdhjetë milionë e dyqind mijë) lekë për financimin me gjysmën e pagës minimale buxhetore për 55 (pesëdhjetë e pesë) punonjës të institucioneve të arsimit parashkollor, parauniversitar dhe universitar.
c) Kisha Katolike në Shqipëri përfiton shumën 26 400 000 (njëzet e gjashtë milionë e katërqind mijë) lekë, të ndarë në:
i. 9 600 000 (nëntë milionë e gjashtëqind mijë) lekë për financimin me gjysmën e pagës minimale buxhetore për 40 (dyzet) punonjës të administratës;
ii. 16 800 000 (gjashtëmbëdhjetë milionë e tetëqind mijë) lekë për financimin me gjysmën e pagës minimale buxhetore për 70 (shtatëdhjetë) punonjës të institucioneve të arsimit parashkollor, parauniversitar dhe universitar.
ç) Kryegjyshata Botërore Bektashiane përfiton shumën 26 360 000 (njëzet e gjashtë milionë e treqind e gjashtëdhjetë mijë) lekë, të ndarë në:
i. 6 000 000 (gjashtë milionë) lekë për financimin, deri në gjysmën e pagës minimale buxhetore për 25 (njëzet e pesë) punonjës të administratës;
ii. 13 360 000 (trembëdhjetë milionë e treqind e gjashtëdhjetë mijë) lekë, si kontribut në ndërtimin e Teqesë së Shtufit, Gjirokastër;
iii. 7 000 000 (shtatë milionë) lekë, për shkak të pozitës së veçantë, si Kryegjyshatë Botërore, me qendër në Tiranë, dhe të shtrirjes së veprimtarisë së saj jashtë vendit, që do të përdoret për të mbuluar plotësisht ose pjesërisht kërkesë-preventivat e paraqitura prej saj në kërkesën e vitit 2025, sipas dokumentacionit financiar të paraqitur.
2. Kalimi i fondit, përcaktuar në pikën 1 të këtij vendimi, bëhet njëherësh, brenda muajit korrik të vitit 2025.
3. Ngarkohen Ministria e Financave dhe Komiteti Shtetëror për Kultet për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E KOEFICIENTIT TË INDEKSIMIT TË BAZËS SË VLERËSUAR TË VITIT 2023 PËR LLOGARITJEN E PENSIONEVE
Në mbështetje të nenit 100 të Kushtetutës dhe të pikave 1 e 3, të nenit 59, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
1. Miratimin e indeksimit të bazës së vlerësuar të vitit 2023, me indeksin 9.3%, të llogaritur sipas kritereve, të përcaktuara në nenin 59, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.
2. Indeksi i përcaktuar sipas pikës 1, të këtij vendimi, aplikohet për llogaritjen e bazës së vlerësuar individuale vjetore, të arritur nëpërmjet kontributeve të paguara dhe rivlerësimeve të tyre, të kryera deri në vitin 2023, dhe zbatohet për efekt të llogaritjes së masës fillestare mujore të pensioneve, me datë lindjeje të së drejtës nga data 1.1.2025 e në vazhdim.
3. Indekset akumulative të bazës së vlerësuar, të arritura nëpërmjet pagave të periudhës 1994-2023, referuar kontributeve të paguara sipas muajve në këtë periudhë dhe pagave referuese sipas punëve dhe profesioneve, e përcaktuar me vendimin nr.561, datë 12.8.2005, të Këshillit të Ministrave, “Për përcaktimin e pagave referuese për llogaritjen e pensioneve”, të ndryshuar, sipas viteve, janë sipas shtojcës nr.1, që i bashkëlidhet këtij vendimi.
4. Pas aplikimit të indeksit të vitit 2023, baza e vlerësuar për efekt të llogaritjes së shumës fillestare mujore të pensioneve, që do të caktohen me datë fillimi nga data 1.1.2025, nuk mund të jetë më e lartë se:
a) trefishi i pagës minimale në shkallë vendi, e përcaktuar me vendim të Këshillit të Ministrave për pagat e periudhës, nga viti 1994 deri më 31.12.2001;
b) paga maksimale në shkallë vendi, e përcaktuar sipas kritereve të nenit 10, të ligjit nr.7703, datë 1.5.1993, “Për sigurimet shoqërore në Republikën e Shqipërisë”, të ndryshuar, për pagat nga viti 2002 e në vazhdim.
5. Efektet financiare, që rrjedhin nga zbatimi i këtij vendimi, lidhen me zbatimin e formulës së caktimit të pensioneve dhe aplikohen vetëm për pensionet me datë fillimi nga data 1.1.2025 e në vazhdim dhe përballohen brenda buxhetit vjetor, të miratuar për Institutin e Sigurimeve Shoqërore.
Ky vendim hyn në fuqi pas botimit në “Fletoren zyrtare” dhe i shtrin efektet financiare nga data 1.1.2025.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË MARRËVESHJES KUADËR, NDËRMJET KËSHILLIT TË MINISTRAVE TË REPUBLIKËS Ë SHQIPËRISË, PËRFAQËSUAR NGA MINISTRIA E MBROJTJES E REPUBLIKËS SË SHQIPËRISË, DHE QEVERISË SË SHTETIT TË IZRAELIT, PËRFAQËSUAR NGA MINISTRIA E MBROJTJES E SHTETIT TË IZRAELIT, NË LIDHJE ME KAPACITETET MBROJTËSE
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, të ndryshuar, me propozimin e ministrit të Mbrojtjes, Këshilli i Ministrave
V E N D O S I:
Miratimin, në parim, të marrëveshjes kuadër, ndërmjet Këshillit të Ministrave të Republikës së Shqipërisë, përfaqësuar nga Ministria e Mbrojtjes e Republikës së Shqipërisë, dhe qeverisë së Shtetit të Izraelit, përfaqësuar nga Ministria e Mbrojtjes e Shtetit të Izraelit, në lidhje me kapacitetet mbrojtëse, sipas tekstit, që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA NDRYSHIME DHE SHTESA NË VENDIMIN NR.348, DATË 29.4.2020, TË KËSHILLIT TË MINISTRAVE, “PËR PROCEDURAT, KRITERET DHE RREGULLAT PËR ZBATIMIN E PROGRAMIT TË NXITJES NËPËRMJET VETËPUNËSIMIT”, TË NDRYSHUAR
Në mbështetje të nenit 100 të Kushtetutës dhe të pikës 4, të nenit 11, të ligjit nr.15/2019, “Për nxitjen e punësimit”, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
I. Në vendimin nr.348, datë 29.4.2020, të Këshillit të Ministrave, “Për procedurat, kriteret dhe rregullat për zbatimin e programit të nxitjes nëpërmjet vetëpunësimit”, të ndryshuar, bëhen këto ndryshime dhe shtesa:
1. Pika 2, e kreut I, ndryshohet, si më poshtë vijon:
“2. Programi i vetëpunësimit mbështet sipërmarrjet e reja nëpërmjet trajnimit për sipërmarrjet dhe zhvillimin e planeve të biznesit për kërkuesit dhe grant për përfituesit.”.
2. Në kreun II bëhen shtesat dhe ndryshimet e mëposhtme:
a) Pas shkronjës “a”, të pikës 1, shtohet shkronja “a/1”, me këtë përmbajtje:
“a/1. Të mos ketë marrë pjesë më parë si punëkërkues i papunë në programet e nxitjes së punësimit në 5 (pesë) vitet e fundit.”.
b) Në pikën 4, fjalët “… në vlerën jo më shumë se 3 000 (tre mijë) lekë …” zëvendësohen me “… në vlerën jo më shumë se 5 000 (pesë mijë) lekë…”.
c) Pika 5 ndryshohet, si më poshtë vijon:
“5. Programi subvencionon për të gjithë të përzgjedhurit si përfitues grantin për ngritjen e biznesit deri në masën 1 000 000 (një milion) lekë.”.
3. Në kreun III bëhen shtesat dhe ndryshimet, si më poshtë vijon:
a) Në pikën 3 bëhen këto ndryshime:
i. Fjalia hyrëse riformulohet:
“Punëkërkuesi duhet të aplikojë on-line, nëpërmjet portalit “e-Albania”, për përfshirjen në program, duke plotësuar: … ”
ii. Shkronja “b” ndryshohet, si poshtë vijon:
“b) Vërtetimin për individ të paregjistruar;”.
b) Në pikën 14, fjalët “… brenda 5 (pesë) ditëve punë, …” zëvendësohen me “ … brenda 10 (dhjetë) ditëve punë …”.
4. Në pikën 5, të kreut IV, togfjalëshi “… 5 (pesë) …” zëvendësohet me “… 10 (dhjetë) …”.
II. Ngarkohen Ministria e Ekonomisë, Kulturës dhe Inovacionit dhe Agjencia Kombëtare e Punësimit dhe Aftësive për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
HAPJEN E PIKËS SË KALIMIT KUFITAR NË AEROPORTIN NDËRKOMBËTAR TË VLORËS
Në mbështetje të nenit 100 të Kushtetutës dhe të pikës 1, të nenit 8, të ligjit nr.71/2016, “Për kontrollin kufitar”, të ndryshuar, me propozimin e ministrit të Brendshëm, Këshilli i Ministrave
V E N D O S I:
1. Hapjen e pikës së kalimit kufitar në Aeroportin Ndërkombëtar të Vlorës për qarkullimin ndërkufitar ajror të shtetasve.
2. Ngarkohen Ministria e Brendshme, Ministria e Infrastrukturës dhe Energjisë, Ministria e Financave dhe Ministria e Bujqësisë dhe Zhvillimit Rural për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E INSTITUCIONEVE QË RIORGANIZOHEN SIPAS LIGJIT PËR INSPEKTIMIN NË REPUBLIKËN E SHQIPËRISË
Në mbështetje të nenit 100 të Kushtetutës dhe të pikës 3, të nenit 3, të ligjit nr.99/2024, “Për inspektimin në Republikën e Shqipërisë”, me propozimin e ministrit të Shtetit për Sipërmarrjen dhe Klimën e Biznesit, Këshilli i Ministrave
V E N D O S I:
1. Institucionet me funksione inspektimi në juridiksionin e pushtetit ekzekutiv të qeverisjes qendrore, në fushën e zbatimit të ligjit nr.99/2024, “Për inspektimin në Republikën e Shqipërisë”, të cilat i nënshtrohen procesit të riorganizimit, janë, si më poshtë vijon:
a) Agjencia Kombëtare e Barnave dhe Pajisjeve Mjekësore;
b) Agjencia Kombëtare e Mjedisit;
c) Agjencia Kombëtare e Pyjeve;
ç) Agjencia Kombëtare e Zonave të Mbrojtura;
d) Autoriteti Kombëtar i Veterinarisë dhe Mbrojtjes së Bimëve;
dh) Autoriteti Kombëtar i Ushqimit;
e) Drejtoria e Përgjithshme e Arkivave;
ë) Drejtoria e Shërbimeve të Peshkimit dhe Akuakulturës;
f) Inspektorati Kombëtar i Mbrojtjes së Territorit;
g) Inspektorati Kombëtar i Mbrojtjes së Trashëgimisë Kulturore;
gj) Inspektorati Shtetëror Shëndetësor;
h) Inspektorati Shtetëror i Punës dhe Shërbimeve Shoqërore;
i) Inspektorati Shtetëror i Mbikëqyrjes së Tregut;
j) Instituti i Shëndetit Publik.
2. Funksionet inspektuese të Agjencisë Kombëtare të Arsimit Parauniversitar dhe të Agjencisë Kombëtare të Bregdetit transferohen në inspektoratet e reja qendrore, që do të krijohen sipas fushave të inspektimit, që mbulojnë ministritë përgjegjëse dhe sipas parimeve të ligjit nr.99/2024, “Për inspektimin në Republikën e Shqipërisë”.
3. Ngarkohen Ministria e Bujqësisë dhe Zhvillimit Rural, Ministria e Shëndetësisë dhe Mbrojtjes Sociale, Ministria e Arsimit dhe Sportit, Ministria e Ekonomisë, Kulturës dhe Inovacionit, Ministria e Brendshme, Ministria e Turizmit dhe Mjedisit dhe institucionet e përcaktuara në pikat 1 dhe 2 për ndjekjen dhe zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E RREGULLAVE TË HOLLËSISHME PËR FUNKSIONIMIN E KOMISIONIT DISIPLINOR NË INSPEKTORATIN E PËRGJITHSHËM
Në mbështetje të nenit 100 të Kushtetutës dhe të pikës 4, të nenit 22, të ligjit nr.99/2024, “Për inspektimin në Republikën e Shqipërisë”, me propozimin e ministrit të Shtetit për Sipërmarrjen dhe Klimën e Biznesit, Këshilli i Ministrave
V E N D O S I:
I. DISPOZITA TË PËRGJITHSHME
1. Ky vendim ka për qëllim të përcaktojë rregullat e hollësishme për funksionimin e komisionit disiplinor në Inspektoratin e Përgjithshëm dhe mënyrën e ushtrimit të përgjegjësive prej tij për organizimin e procedurës disiplinore dhe vendimmarrjen.
2. Në këtë vendim, termat e mëposhtëm kanë këto kuptime:
a) “Komision disiplinor”, organi ad hoc, i ngritur në Inspektoratin e Përgjithshëm, që shqyrton dhe trajton rastet e shkeljeve disiplinore, të kryera nga kryeinspektorët qendrorë dhe inspektorët e të gjitha pozicioneve në inspektoratet qendrore, strukturat e tjera inspektuese në fushën e zbatimit të ligjit nr.99/2024, “Për inspektimin në Republikën e Shqipërisë”, dhe në Inspektoratin e Përgjithshëm;
b) “Kryeinspektor qendror”, nëpunësi me funksione inspektimi, që drejton veprimtarinë e inspektoratit qendror dhe ushtron kompetencat e përcaktuara në ligjin nr.99/2024, “Për inspektimin në Republikën e Shqipërisë”, dhe ligjin e posaçëm;
c) “Inspektor”, nëpunësi, që ushtron funksione inspektimi në inspektoratet qendrore në strukturat e tjera inspektuese ose në Inspektoratin e Përgjithshëm, në pozicionet inspektor, përgjegjës sektori, drejtor drejtorie ose kryeinspektor i drejtorisë rajonale;
ç) “Struktura të tjera inspektuese”, strukturat, që kryejnë funksione inspektimi dhe që janë në fushën e zbatimit të ligjit nr.99/2024, “Për inspektimin në Republikën e Shqipërisë”, por nuk janë të organizuara si inspektorate qendrore;
d) “Procedurë disiplinore” përfshin gjithë veprimtarinë administrative që kryhet, që nga momenti i konstatimit të shkeljes së pretenduar disiplinore, vënies në dijeni, me shkrim, të kryeinspektorit apo inspektorit, që pretendohet se ka kryer shkeljen, deri në marrjen e një vendimi përfundimtar nga komisioni disiplinor. Pranimi i kërkesës për procedimin disiplinor shënon fillimin e procedurës disiplinore;
dh) “Provë”, e dhëna, dëshmia, dokumenti apo fakti, që shërben në nxjerrjen e konkluzioneve të procedimit disiplinor dhe që merret në përputhje me dispozitat e parashikuara nga Kodi i Procedurave Administrative;
e) “Vendim përfundimtar”, vendimi i komisionit disiplinor për marrjen e masës disiplinore ose ndërprerjen e ecurisë disiplinore.
3. Parimet kryesore, mbi bazën e të cilave zhvillon veprimtarinë komisioni disiplinor, janë:
a) parimi i transparencës;
b) parimi i ligjshmërisë dhe i barazisë para ligjit;
c) parimi i procesit të rregullt disiplinor, që garanton të drejtën për t’u informuar, për të kërkuar sqarime rreth fakteve, për t’u dëgjuar e për t’u mbrojtur;
ç) parimi i proporcionalitetit në përcaktimin e masës disiplinore;
d) parimi i pavarësisë dhe paanësisë;
dh) parimi i mbrojtjes së të dhënave personale dhe konfidencialitetit;
e) parimi i përgjegjësisë;
ë) parimi i ushtrimit të ligjshëm të diskrecionit.
II. PËRBËRJA DHE FUNKSIONIMI I KOMISIONIT DISIPLINOR
1. Komisioni disiplinor shqyrton rastet e shkeljeve të lehta, të rënda dhe shumë të rënda, të kryera nga kryeinspektori qendror dhe nga inspektori në inspektoratet qendrore, në strukturat e tjera inspektuese dhe në Inspektoratin e Përgjithshëm.
2. Komisioni disiplinor ngrihet me urdhër të inspektorit të Përgjithshëm.
3. Komisioni disiplinor, për inspektorin e të gjitha pozicioneve në inspektoratet qendrore, përbëhet nga 3 (tre) anëtarë dhe ka këtë përbërje:
a) zëvendësinspektorin e Përgjithshëm ose një drejtor drejtorie pranë Inspektoratit të Përgjithshëm, i cili kryeson komisionin;
b) një përgjegjës sektori pranë Inspektoratit të Përgjithshëm;
c) kryeinspektorin qendror ose një përfaqësues të caktuar prej tij në drejtorinë qendrore të inspektoratit qendror, ku inspektori ka emërimin.
4. Në rastin e procedimit disiplinor të inspektorit në strukturat e tjera inspektuese, komisioni disiplinor ka në përbërje anëtarët e përcaktuar në shkronjat “a” dhe “b”, të pikës 3, të këtij kreu, dhe drejtuesin në strukturat e tjera inspektuese. Në rastin e procedimit disiplinor të drejtuesit të strukturës tjetër inspektuese, komisioni disiplinor ka në përbërje anëtarët e përcaktuar në shkronjat “a” e “b”, të pikës 3, të këtij kreu, dhe titullarin e institucionit, ku drejtuesi ka emërimin.
5. Në rastin e procedimit disiplinor të kryeinspektorit qendror, komisioni disiplinor përbëhet nga 3 (tre) anëtarë dhe ka në përbërje 2 (dy) anëtarët e përcaktuar në shkronjat “a” e “b”, të pikës 3, të këtij kreu, dhe 1 (një) anëtar, përfaqësues nga ministri përgjegjës, në nivel sekretar i përgjithshëm ose drejtor i përgjithshëm në ministrinë përgjegjëse.
6. Në rastin e procedimit disiplinor të inspektorit të Inspektoratit të Përgjithshëm, komisioni disiplinor ka në përbërje 2 (dy) anëtarë të pozicioneve drejtor drejtorie dhe 1 (një) anëtar, përfaqësues nga struktura përgjegjëse e burimeve njerëzore pranë Inspektoratit të Përgjithshëm.
7. Anëtarët e komisionit disiplinor duhet të tërhiqen nga procedimi disiplinor, në rastet kur ekzistojnë një nga pengesat ligjore të parashikuara në nenin 30, të Kodit të Procedurave Administrative. Me njoftimin e heqjes dorë ose me konstatimin nga komisioni disiplinor, që anëtari është në kushtet e pengesës ligjore, inspektori i Përgjithshëm vendos zëvendësimin e anëtarit ose kërkon caktimin e përfaqësuesit nga inspektorati qendror, nga struktura tjetër inspektuese ose nga ministria përgjegjëse, që do të zëvendësojë anëtarin e tërhequr nga komisioni disiplinor. Inspektorati qendror, struktura tjetër inspektuese ose ministria përgjegjëse cakton përfaqësuesin brenda 5 (pesë) ditëve kalendarike dhe njofton menjëherë inspektorin e Përgjithshëm.
8. Për rastet kur konstatohet pamundësia e vijimit të pjesëmarrjes në komision të njërit prej anëtarëve të komisionit, sipas përcaktimit në pikën 7, të këtij kreu, apo në raste të pamundësisë objektive, inspektori i Përgjithshëm cakton një përfaqësues tjetër, brenda një afati prej 3 (tri) ditësh pune, nga momenti i konstatimit të këtij fakti.
9. Në kuptim të pikës 8, të këtij kreu, raste të pamundësisë objektive konsiderohen rastet e mëposhtme:
a) Martesa e anëtarit, paraardhësit apo pasardhësit të tij;
b) Lindja e fëmijës për baballarët;
c) Vdekja e prindërve, e gjyshërve, e bashkëshortit, e fëmijës, e vëllezërve, e motrave;
ç) Sëmundja e rëndë e anëtarit, e fëmijës, e prindërve apo e bashkëshortit, të vërtetuara me raport mjekësor.
10. Mbledhja e komisionit disiplinor është e vlefshme kur janë të pranishëm të gjithë anëtarët e tij dhe drejtohet nga kryetari.
11. Kryetari i komisionit disiplinor kryen këto detyra:
a) Administron dosjen hetimore, objekt shqyrtimi të komisionit disiplinor për zhvillimin e procedimit disiplinor;
b) Cakton dhe njofton për datën e vendin e mbledhjes dhe merr konfirmimin me shkresë ose mjete elektronike të anëtarëve të komisionit disiplinor dhe kryeinspektorit apo inspektorit, ndaj të cilit ka filluar procedimi disiplinor;
c) Cakton dhe njofton rendin e ditës së çdo mbledhjeje, si dhe cakton relatorin e çështjes;
ç) Hap, drejton dhe mbyll mbledhjen e komisionit disiplinor, duke siguruar mbarëvajtjen e saj, në përputhje me kërkesat e këtij vendimi;
d) Administron materialet e nevojshme për procedimin disiplinor, të cilat kërkohen nga anëtarët e tjerë;
dh) Së bashku me anëtarët e tjerë, merr vendim për pranimin e kërkesës për heqjen dorë ose përjashtimin e anëtarit të komisionit disiplinor, kur ka konflikt interesi apo ka dyshime në lidhje me paanësinë e tij në vendimmarrje;
e) Siguron zbatimin e ligjit dhe marrjen e vendimeve të drejta;
ë) U jep fjalën anëtarëve të tjerë të komisionit ose palëve në procedimin disiplinor, nëse ata e kërkojnë, për të paraqitur pretendimet dhe sqarimet e tyre;
f) Nënshkruan të gjitha aktet e nxjerra nga komisioni disiplinor.
12. Anëtari i komisionit disiplinor kryen të paktën këto detyra:
a) Njofton, me shkrim ose në rrugë elektronike, kryetarin për pjesëmarrjen në mbledhjen e komisionit disiplinor;
b) Merr pjesë në mbledhje dhe respekton dispozitat e këtij vendimi;
c) Ruan të dhënat me të cilat është njohur gjatë kryerjes së veprimtarisë së tij, duke respektuar parimin e konfidencialitetit dhe mbrojtjes së të dhënave personale, sipas legjislacionit në fuqi;
ç) Paraqet kërkesën për heqje dorë nga shqyrtimi i procedimit disiplinor, në rast konflikti interesi ose të një pengese ligjore;
d) Voton për vendimet që merr komisioni disiplinor;
dh) Nënshkruan të gjitha aktet e nxjerra nga komisioni disiplinor;
e) Çdo detyrë tjetër, sipas këtij vendimi, ose që i caktohet nga kryetari.
13. Komisioni disiplinor mbështetet nga sekretariati teknik, veprimtaria e të cilit mbikëqyret nga drejtuesi i burimeve njerëzore pranë Inspektoratit të Përgjithshëm. Në urdhrin për ngritjen e komisionit disiplinor caktohet një punonjës nga njësia e burimeve njerëzore pranë Inspektoratit të Përgjithshëm, në cilësinë e sekretariatit teknik, i cili ndihmon kryetarin dhe anëtarët e komisionit disiplinor gjatë procedimit disiplinor.
14. Sekretariati teknik ushtron këto detyra:
a) Përgatit njoftimet për mbledhjen e komisionit disiplinor;
b) Krijon kushtet për mbarëvajtjen e procedurës;
c) Kryen të gjitha procedurat për të siguruar administrimin e dokumentacionit të nevojshëm për procesin e vendimmarrjes së komisionit disiplinor;
ç) Mban procesverbalin e mbledhjeve;
d) Përgatit dosjen që lidhet me rendin e ditës së mbledhjes dhe të gjitha faktet e provat e administruara me çështjen në shqyrtim.
15. Komisioni disiplinor mblidhet dhe zhvillon seancën dëgjimore, jo më vonë se 10 (dhjetë) ditë kalendarike nga nxjerrja e urdhrit të inspektorit të Përgjithshëm për ngritjen e komisionit dhe zhvillimin e procedimit disiplinor.
16. Kryetari i komisionit disiplinor cakton datën e mbledhjes, jo më vonë se 3 (tri) ditë kalendarike nga marrja e urdhrit të inspektorit të Përgjithshëm.
17. Kur nuk plotësohet kuorumi i nevojshëm për mbledhjen, kryetari vendos thirrjen e mbledhjes në një ditë tjetër të afërt.
18. Në seancën dëgjimore, kryeinspektori apo inspektori paraqitet vetë ose cakton një përfaqësues, sipas ligjit. Në rast se pas dy njoftimeve të njëpasnjëshme, kryeinspektori, inspektori apo përfaqësuesi ligjor nuk paraqiten, procedura disiplinore vazhdon në mungesë.
19. Dokumentimi i të gjithë veprimtarisë së komisionit disiplinor gjatë mbledhjes pasqyrohet në procesverbalin e mbledhjes, i cili përmban:
a) datën dhe vendin e mbledhjes;
b) anëtarët që marrin pjesë në mbledhje;
c) çështjet që u diskutuan në mbledhje;
ç) vendimet që u morën në mbledhje;
d) dorëheqjet e anëtarëve dhe arsyet përkatëse;
dh) rezultatet e votimit dhe arsyetimin e votimit të secilit anëtar.
20. Procesverbali i mbledhjes u paraqitet për miratim të gjithë anëtarëve në fund të mbledhjes. Pas miratimit, procesverbali nënshkruhet nga kryetari, anëtarët dhe sekretari teknik.
21. Marrja e vendimeve në mbledhjen e komisionit disiplinor bëhet me votim, i cili është individual dhe i hapur. Secili prej anëtarëve ka të drejtën e ushtrimit të një vote. Në asnjë rast, anëtarët e komisionit disiplinor nuk mund të abstenojnë.
22. Vendimet e komisionit disiplinor miratohen me shumicën e gjithë anëtarëve të komisionit dhe arsyetohen në mënyrë të plotë. Arsyetimi i anëtarit që ka votuar “kundër” depozitohet në sekretariatin teknik dhe përcillet bashkë me vendimin përfundimtar.
23. Vendimi përfundimtar i komisionit disiplinor për marrjen e masës disiplinore përmban këto të dhëna:
a) Organin që ka marrë vendimin;
b) Identifikimin e inspektorit ose kryeinspektorit ndaj të cilit është zhvilluar procedimi disiplinor dhe është marrë masa disiplinore;
c) Datën e miratimit;
ç) Masën e marrë;
d) Shkeljen faktike;
dh) Bazën ligjore;
e) Arsyetimin e vendimit dhe shpjegimin e fakteve, që janë bërë shkak për marrjen e vendimit;
ë) Rastet e mëparshme të shkeljeve të ngjashme dhe të masave disiplinore të marra;
f) Një listë dhe kopje të të gjitha dokumenteve, që mbështesin masën disiplinore të dhënë;
g) Nënshkrimin e të gjithë anëtarëve të komisionit disiplinor.
24. Vendimi zbardhet brenda 5 (pesë) ditëve kalendarike nga shpallja e vendimit në 3 (tri) kopje origjinale: një kopje mbahet nga Inspektorati i Përgjithshëm, një kopje nga ministria përgjegjëse/inspektorati qendror/struktura tjetër inspektuese dhe një kopje i përcillet kryeinspektorit apo inspektorit të proceduar.
25. Inspektori i Përgjithshëm, brenda 5 (pesë) ditëve nga data e paraqitjes së vendimit të komisionit disiplinor dhe materialeve shoqëruese, nxjerr urdhrin për zbatimin e masave që vendosen në procedimin disiplinor, në të cilin parashikohen edhe modalitetet e zbatimit të tij.
26. Vendimi i komisionit disiplinor përkatës bëhet pjesë e dosjes personale të kryeinspektorit ose inspektorit pranë burimeve njerëzore të institucionit përkatës.
III. DISPOZITA TË FUNDIT DHE KALIMTARE
1. Deri në përfundimin e procesit të riorganizimit të institucioneve me funksione inspektimi, sipas përcaktimeve në ligjin nr.99/2024, “Për inspektimin në Republikën e Shqipërisë”, dispozitat e këtij vendimi do të zbatohen edhe për kryeinspektorin dhe inspektorin e inspektoratit shtetëror e të strukturave të tjera përgjegjëse për inspektimin.
2. Për institucionet/strukturat me funksione inspektimi, për të cilat nuk janë parashikuar ndryshime në ligjin nr.99/2024, “Për inspektimin në Republikën e Shqipërisë”, nuk zbatohen parashikimet e këtij vendimi.
3. Ngarkohen ministritë përgjegjëse, Inspektorati i Përgjithshëm, inspektoratet qendrore dhe strukturat e tjera inspektuese për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E RREGULLAVE, TË PROCEDURAVE DHE TË KOHËZGJATJES SË MBROJTJES PERSONALE DHE BANESËS SË PERSONALITETEVE TË TJERA PAS PËRFUNDIMIT TË DETYRËS
Në mbështetje të nenit 100 të Kushtetutës dhe të neneve 13, pika 4, e 14, pika 3, të ligjit nr.33/2021, “Për Gardën e Republikës së Shqipërisë”, të ndryshuar, me propozimin e ministrit të Brendshëm, Këshilli i Ministrave
V E N D O S I:
I. KUSHTET PËR TË PËRFITUAR MBROJTJEN E VEÇANTË
1. Garda e Republikës së Shqipërisë ruan e mbron, pas përfundimit të detyrës, personalitetet apo banesën e tyre, kur u rrezikohet jeta, shëndeti apo familja, për shkak të detyrës që kanë kryer.
2. Kushtet për të përfituar ruajtjen fizike dhe mbrojtjen e banesës janë:
a) prania e rrethanave serioze, që rrezikojnë jetën, shëndetin apo familjen e personalitetit apo banesën e tij, brenda gjashtë muajve nga përfundimi i detyrës;
b) prania e lidhjes shkakësore ndërmjet rrethanave serioze dhe ushtrimit të funksionit të mëparshëm nga personaliteti.
II. PROCEDURA PËR DHËNIEN E MBROJTJES SË VEÇANTË
1. Kërkesa për mbrojtjen, sipas pikës 1, të kreut I, të këtij vendimi, i paraqitet me shkrim ministrit të Brendshëm nga vetë personaliteti i rrezikuar.
2. Kërkesa për mbrojtje përmban:
a) gjenealitetet e plota të kërkuesit;
b) një përmbledhje të fakteve dhe të rrethanave, që përbëjnë rrezik serioz për personalitetin apo banesën e tij, të cilat e detyrojnë të kërkojë mbrojtje edhe pas përfundimit të detyrës.
3. Ministri i Brendshëm urdhëron menjëherë, por jo më vonë se 24 (njëzet e katër) orë, mbledhjen e Komisionit të Posaçëm për të bërë vlerësimin e kërkesës.
4. Komisioni i Posaçëm vlerëson kërkesën e paraqitur, si autoriteti vendimmarrës për mbrojtjen e veçantë.
5. Pas shqyrtimit të kërkesës për nevojën e mbrojtjes së personalitetit apo të banesës së tij, komisioni merr vendim brenda 48 (dyzet e tetë) orëve. Vendimi u njoftohet ministrit të Brendshëm dhe personalitetit të rrezikuar.
6. Komisioni, në procesin e shqyrtimit të kërkesës për mbrojtje, sipas këtij vendimi, mund të kërkojë informacione nga institucione të tjera.
7. Vendimi përmban nivelin e sigurisë dhe masat e mbrojtjes, numrin e truprojave apo të rojeve për banesën, afatin e mbrojtjes, si dhe masa të tjera, që lidhen me këtë mbrojtje.
8. Mbrojtja e personalitetit apo e banesës zgjat për aq kohë sa janë të pranishme rrethanat e rrezikut, por jo më shumë se një vit.
9. Me përfundimin e afatit maksimal të mbrojtjes, sipas pikës 8, të këtij kreu, Komisioni i Posaçëm vendos për:
a) vijimin e mbrojtjes me të njëjtat masa;
b) përfundimin e mbrojtjes;
c) ndryshimin e masave të sigurisë.
10. Pas vendimit të komisionit, Garda e Republikës merr menjëherë në mbrojtje personalitetin apo banesën e rrezikuar, duke zbatuar masat e përcaktuara në vendim.
III. PËRBËRJA DHE FUNKSIONIMI I KOMISIONIT TË POSAÇËM
1. Komisioni i Posaçëm përbëhet nga:
a) zëvendësministri i Brendshëm;
b) zëvendësdrejtori i Përgjithshëm i Policisë së Shtetit;
c) zëvendësdrejtori i Përgjithshëm i Gardës së Republikës;
ç) një përfaqësues i Prokurorisë së Posaçme Kundër Korrupsionit dhe Krimit të Organizuar;
d) një përfaqësues i Byrosë Kombëtare të Hetimit;
dh) një përfaqësues nga Shërbimi Informativ i Shtetit, në nivel drejtor drejtorie;
e) një përfaqësues nga Agjencia e Inteligjencës dhe Sigurisë së Mbrojtjes, në nivel drejtor drejtorie.
2. Kryetar i Komisionit të Posaçëm, të përcaktuar në pikën 1, të këtij kreu, është zëvendësministri i Brendshëm.
3. Pjesëmarrja në mbledhjet e komisionit është e detyrueshme. Mbledhjet e komisionit janë të vlefshme kur janë të pranishëm jo më pak se 5 (pesë) anëtarë me të drejtë vote.
4. Vendimet e komisionit janë të vlefshme kur miratohen nga më shumë se gjysma e anëtarëve të pranishëm në mbledhje.
5. Kryetari i komisionit cakton një sekretariat teknik, i cili mbështet organizimin, funksionimin dhe mban procesverbalin e zhvillimit të mbledhjes.
IV. DISPOZITA PËRFUNDIMTARE
Ngarkohen Ministria e Brendshme dhe Garda e Republikës për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E RREGULLAVE TË HOLLËSISHME PËR FUNKSIONIMIN E KOMISIONIT TË SHQYRTIMIT TË ANKIMIT
Në mbështetje të nenit 100 të Kushtetutës dhe të pikës 5, të nenit 55, të ligjit nr.99/2024, “Për inspektimin në Republikën e Shqipërisë”, me propozimin e ministrit të Shtetit për Sipërmarrjen dhe Klimën e Biznesit, Këshilli i Ministrave
V E N D O S I:
I. DISPOZITA TË PËRGJITHSHME
1. Ky vendim përcakton rregullat e hollësishme për organizimin, funksionimin dhe vendimmarrjen e Komisionit të Shqyrtimit të Ankimit, sipas parashikimeve në ligjin nr.99/2024, “Për inspektimin në Republikën e Shqipërisë”.
2. Në kuptim të këtij vendimi, termat e mëposhtëm kanë këto kuptime:
a) “Komisioni i shqyrtimit të ankimit”, në vijim “Komisioni”, organi kolegjial i ngritur pranë Inspektoratit të Përgjithshëm, i cili shqyrton ankimin administrativ, të paraqitur nga subjekti i inspektimit kundër vendimit përfundimtar të inspektimit;
b) “Struktura të tjera inspektuese”, strukturat që kryejnë funksione inspektimi në juridiksionin e pushtetit ekzekutiv të qeverisjes qendrore dhe që janë në fushën e zbatimit të ligjit nr.99/2024, “Për inspektimin në Republikën e Shqipërisë”, por nuk janë të organizuara si inspektorate qendrore;
c) “Subjekt i inspektimit”, çdo person fizik apo juridik, privat apo publik, i cili kryen veprimtari tregtare, ekonomike, profesionale apo veprime të tjera dhe që ka detyrimin të respektojë kërkesat ligjore në fushën e inspektimit;
ç) “Vendim përfundimtar i inspektimit”, vendimi, i cili merret nga trupa inspektuese, sipas përcaktimeve në ligjin nr.99/2024, “Për inspektimin në Republikën e Shqipërisë”.
3. Vendimi i “Komisionit të shqyrtimit të ankimit” është vendim përfundimtar në nivel administrativ.
4. Në ushtrimin e funksioneve të parashikuara në ligjin për inspektimin dhe në këtë vendim, Komisioni udhëhiqet nga këto parime:
a) Parimi i ligjshmërisë;
b) Parimi i barazisë dhe mosdiskriminimit;
c) Parimi i pavarësisë dhe paanësisë në vendimmarrje;
ç) Parimi i transparencës dhe informimit;
d) Parimi i mbrojtjes së të dhënave dhe konfidencialitetit;
dh) Parimi i objektivitetit;
e) Parimi i ushtrimit të ligjshëm të diskrecionit administrativ;
ë) Parimi i proporcionalitetit;
f) Parimi i dispozitës më të favorshme ligjore;
g) Parimi i procesit të rregullt ligjor, që garanton të drejtën për t’u informuar, për të kërkuar sqarime rreth fakteve, për t’u dëgjuar dhe për t’u mbrojtur.
5. Çdo çështje që nuk parashikohet në këtë vendim rregullohet sipas Kodit të Procedurave Administrative dhe ligjit nr.99/2024, “Për inspektimin në Republikën e Shqipërisë”.
II. ORGANIZIMI DHE FUNKSIONIMI I KOMISIONIT TË SHQYRTIMIT TË ANKIMIT
1. Komisioni i Shqyrtimit të Ankimit organizohet si strukturë ad hoc, që ngrihet për shqyrtimin e ankimit të paraqitur nga subjekti i inspektimit kundër vendimit përfundimtar të inspektimit.
2. Komisioni i Shqyrtimit të Ankimit ngrihet me urdhër të inspektorit të Përgjithshëm dhe ka në përbërje 5 (pesë) anëtarë, si më poshtë:
a) Dy përfaqësues nga Inspektorati i Përgjithshëm, ku njëri prej tyre kryeson komisionin;
b) Një përfaqësues nga ministria përgjegjëse e inspektoratit qendror ose strukturës përgjegjëse për inspektimin, ndaj vendimmarrjes së të cilit/cilës është drejtuar ankimi administrativ;
c) Një përfaqësues nga inspektorati qendror/struktura përgjegjëse për inspektimin, ndaj vendimmarrjes së të cilit/cilës është drejtuar ankimi administrativ;
ç) Një përfaqësues nga organizata joqeveritare me aktivitet në fushën e biznesit apo nga organet e përfaqësimit të biznesit.
3. Përfaqësuesit e përcaktuar në shkronjën “b”, të pikës 2, propozohen nga ministria përgjegjëse e inspektoratit qendror ose strukturës përgjegjëse për inspektimin ndaj vendimit të së cilit/cilës është drejtuar ankim administrativ.
4. Përfaqësuesit e përcaktuar në shkronjën “c”, të pikës 2, propozohen nga inspektorati qendror ose struktura përgjegjëse për inspektimin ndaj vendimit të së cilit/cilës është drejtuar ankim administrativ.
5. Anëtari i komisionit sipas përcaktimit në shkronjën “ç”, të pikës 2, të këtij kreu, duhet të jetë përfaqësues i organizatave joqeveritare me aktivitet në fushën e biznesit apo nga organet e përfaqësimit të biznesit, i cili të ketë njohuri dhe eksperiencë në fushën e marrëdhënieve me biznesin ose në fushën e legjislacionit.
6. Organizatat joqeveritare me aktivitet në fushën e biznesit apo organet e përfaqësimit të biznesit, në përputhje me fushat që mbulojnë dhe sipas fushave të inspektimit, përcaktojnë përfaqësuesin e tyre dhe anëtarët zëvendësues në Komisionin e Shqyrtimit të Ankimit.
7. Anëtarët e Komisionit duhet të kenë kualifikim sipas fushës dhe natyrës së objektit të ankimimit që trajtohet nga komisioni.
8. Komisioni ad hoc funksionon vetëm për çështje për të cilat është ngritur.
9. Anëtarët e Komisionit të Shqyrtimit të Ankimit duhet të tërhiqen nga shqyrtimi i ankimit administrativ në rastet kur ekziston një nga pengesat ligjore të parashikuara në nenin 30, të Kodit të Procedurave Administrative.
10. Për rastet kur konstatohet pamundësia e vijimit të ushtrimit të funksioneve të njërit prej anëtarëve të komisionit, sipas përcaktimit të pikës 9, të këtij kreu, apo në raste të pamundësive objektive, inspektori i Përgjithshëm, në rastin e përfaqësuesit të përcaktuar në shkronjën “ç”, të pikës 2, të këtij kreu, cakton si anëtar zëvendësuesin e tij ose u kërkon institucioneve të parashikuara në pikat 3 dhe 4, të këtij kreu, caktimin e një anëtari zëvendësues, brenda një afati prej 3 (tri) ditësh punë nga momenti i konstatimit të këtij fakti.
11. Në kuptim të pikës 10, raste të pamundësisë objektive konsiderohen rastet e mëposhtme:
a) Martesa e anëtarit, paraardhësit apo pasardhësit të tij;
b) Lindja e fëmijës për baballarët;
c) Vdekja e prindërve, gjyshërve, bashkëshortit/bashkëjetuesit, fëmijës, vëllezërve, motrave;
ç) Sëmundja e anëtarit, fëmijës, prindërve apo bashkëshortit/bashkëjetuesit, të vërtetuara me raport mjekësor.
III. KOMPETENCAT DHE DETYRAT E KOMISIONIT TË SHQYRTIMIT TË ANKIMIT
1. Komisioni i Shqyrtimit të Ankimit kryen të gjitha veprimet e nevojshme, me qëllim realizimin e një hetimi administrativ të plotë dhe të gjithanshëm, në përputhje me përcaktimet e Kodit të Procedurave Administrative dhe ligjit nr.99/2024, “Për inspektimin në Republikën e Shqipërisë”.
2. Përpara fillimit të seancës për shqyrtimin e ankimit administrativ, kryetari dhe anëtarët e Komisionit plotësojnë formularin e deklarimit të konfliktit të interesit.
3. Komisioni ushtron veprimtarinë e tij në mënyrë kolegjiale, sipas rregullave dhe procedurave të parashikuara në legjislacionin për organizimin dhe funksionimin e organeve kolegjiale, me përjashtim të rasteve kur është parashikuar ndryshe në këtë vendim.
4. Kryetari i Komisionit caktohet nga inspektori i Përgjithshëm dhe ushtron këto detyra:
a) Cakton datën e zhvillimit të mbledhjes së Komisionit dhe vendos për rendin e ditës së çdo mbledhjeje;
b) Drejton zhvillimin e mbledhjeve të komisionit;
c) Mbikëqyr veprimtarinë e sekretariatit teknik të komisionit;
ç) Ruan konfidencialitetin e informacionit të marrë gjatë ushtrimit të funksioneve të tij;
d) Deklaron në mbledhjen e radhës, para votimit të çdo çështjeje, nëse ai apo anëtarët e Komisionit janë në kushtet e konfliktit të interesit;
dh) U jep fjalën anëtarëve të komisionit ose palëve në proces për të paraqitur pretendimet dhe sqarimet e tyre;
e) Cakton relatorin e çështjes, i cili është një nga përfaqësuesit e Inspektoratit të Përgjithshëm.
5. Anëtari i Komisionit ushtron këto detyra:
a) Merr pjesë në mbledhjet e Komisionit;
b) Deklaron gjendjen në kushtet e konfliktit të interesit;
c) Ruan konfidencialitetin e informacionit të marrë gjatë ushtrimit të funksionit;
ç) Voton për çështjet e rendit të ditës;
d) Nënshkruan vendimin e Komisionit, në përputhje me parashikimet e Kodit të Procedurave Administrative dhe legjislacionin në fuqi.
6. Komisioni i Shqyrtimit të Ankimit mbështetet nga sekretariati teknik, përbërja e të cilit caktohet me urdhër të inspektorit të Përgjithshëm.
7. Sekretariati teknik ka këto detyra dhe përgjegjësi:
a) Verifikon dokumentacionin për shqyrtimin e ankimit administrativ, përgatit dosjen që lidhet me rendin e ditës së mbledhjes me të gjitha faktet dhe provat e administruara me çështjen, objekt ankimi, dhe ia paraqet komisionit përpara fillimit të mbledhjes;
b) Përpilon njoftimet për mbledhjen e Komisionit;
c) Paraqet informacion lidhur me subjektin, përmbajtjen e ankimit, si dhe dokumentacionin përkatës;
ç) Mban procesverbalin e mbledhjes dhe e nënshkruan;
d) Zbardh vendimin e arsyetuar, brenda 2 (dy) ditëve punë;
dh) I paraqet inspektorit të Përgjithshëm, brenda 2 (dy) ditëve punë, vendimin e nënshkruar nga komisioni dhe procesverbalin e mbajtur e të nënshkruar nga kryetari i komisionit;
e) Ngarkon në sistemin elektronik “e-Inspektimi”, brenda 2 (dy) ditëve punë vendimin e arsyetuar të marrë nga komisioni, aktet e mbajtura gjatë shqyrtimit të ankimit dhe të gjithë dokumentacionin e çështjes;
ë) Ia njofton vendimin e Komisionit, brenda 2 (dy) ditëve punë, Inspektoratit Qendror dhe subjektit, me mjete elektronike ose me forma të tjera, të parashikuara nga legjislacioni në fuqi.
8. Me nxjerrjen e urdhrit të inspektorit të Përgjithshëm për ngritjen e Komisionit të Shqyrtimit të Ankimit, sekretariati teknik, përmes sistemit “e-Inspektimi” njofton me postë elektronike kryetarin dhe anëtarët e komisionit, të cilëve u vë në dispozicion numrin e çështjes së ankimuar dhe gjithë dokumentacionin përkatës të dosjes së ankimit, objekt shqyrtimi.
9. Kryetari i Komisionit, brenda 5 (pesë) ditëve punë nga urdhri i inspektorit të Përgjithshëm për ngritjen e komisionit, njofton anëtarët për datën dhe orën e shqyrtimit të ankimit, e cila duhet të jetë jo më vonë se 5 (pesë) ditë nga momenti i njoftimit të kryetarit.
10. Mbledhja e Komisionit është e vlefshme kur janë të pranishëm më shumë se gjysma e anëtarëve të tij. Në rast se numri i votave është i barabartë, vota e kryetarit është përcaktuese në marrjen e vendimit.
11. Subjekti i inspektimit ka të drejtë të dëgjohet dhe të paraqitet në seancë sipas njoftimit të komisionit. Në rast se subjekti i inspektimit ose përfaqësuesi ligjor i tij nuk është i pranishëm, edhe pse ka marrë dijeni dhe është njoftuar rregullisht, Komisioni vlerëson shkaqet e mosparaqitjes në seancë. Nëse mosparaqitja ka ndodhur për shkaqe që nuk vlerësohen të arsyeshme, Komisioni vendos zhvillimin e seancës pa praninë e subjektit ose përfaqësuesit të tij. Në rastet kur vlerësohet se subjekti i inspektimit ka paraqitur shkaqe të arsyeshme apo shkaqe, të cilat vlerësohen si të tilla, kryetari shtyn mbledhjen duke kryer një njoftim të dytë për një datë sa më të afërt. Në rast se edhe në këtë datë subjekti i njoftuar rregullisht dhe/ose përfaqësuesi i tij nuk paraqiten para komisionit, vendoset vazhdimi i seancës në mungesë.
IV. ANKIMI ADMINISTRATIV
1. Çdo subjekt inspektimi, që pretendon se i është cenuar një e drejtë apo një interes i ligjshëm nga një vendim përfundimtar inspektimi, ka të drejtë të bëjë ankim administrativ ndaj këtij vendimi.
2. Ankimi i adresohet Komisionit të Shqyrtimit të Ankimit, pranë Inspektoratit të Përgjithshëm, brenda 30 (tridhjetë) ditëve kalendarike nga data e marrjes dijeni të vendimit përfundimtar, përveçse kur parashikohet ndryshe në ligjin e posaçëm.
3. Ankimi drejtuar komisionit paraqitet në gjuhën shqipe, në përputhje me rregullat e përcaktuara në Kodin e Procedurave Administrative. Në çdo rast, ankimi administrativ që përmbush kriteret ligjore pranohet në çdo formë, me mjete elektronike (on-line) ose në forma të tjera të parashikuara nga legjislacioni në fuqi, të paraqitura nga subjekti i inspektimit.
4. Ankimi i administruar në formë elektronike printohet dhe regjistrohet në protokollin e Inspektoratit të Përgjithshëm.
5. Regjistrimi i ankimit administrativ nuk mund të refuzohet për asnjë shkak.
6. Subjekti ankimues mund të kërkojë rivendosjen në afat sipas afateve dhe përcaktimeve në Kodin e Procedurave Administrative. Kërkesa i adresohet Komisionit të Shqyrtimit të Ankimit pranë Inspektoratit të Përgjithshëm.
7. Shqyrtimi i kërkesës për rivendosje në afat bëhet nga Komisioni i Shqyrtimit të Ankimit në mbledhjen e tij më të afërt, por jo më vonë se 15 (pesëmbëdhjetë) ditë nga momenti i paraqitjes së kërkesës dhe vendimi pasqyrohet në procesverbal e i njoftohet subjektit.
8. Kundër vendimit të Komisionit për mospranimin e kërkesës për rivendosjen në afat mund të bëhet ankim, sipas rregullave të përcaktuara në Kodin e Procedurave Administrative.
V. PROCEDURA E SHQYRTIMIT TË ANKIMIT ADMINISTRATIV
1. Me caktimin e çështjes, relatori verifikon paraprakisht kushtet formale të ankimit dhe i relaton fillimisht komisionit rezultatet e verifikimit lidhur me:
a) juridiksionin administrativ dhe kompetencën lëndore të komisionit;
b) legjitimimin e ankimuesit;
c) respektimin e afateve ligjore për ankimin;
ç) elementet e domosdoshme të ankesës, sipas përcaktimeve në këtë vendim.
2. Komisioni, gjatë shqyrtimit paraprak, merr një nga vendimet e mëposhtme:
a) Kthimin e ankimit për shkak të mungesës së kushteve formale të tij dhe i lë afat ankimuesit 5 (pesë) ditë për plotësimin e dosjes së ankimit, sipas Kodit të Procedurave Administrative;
b) Pranimin e ankimit, fillimin e procedurës së hetimit administrativ dhe kalimin e ankimit për shqyrtim të thelluar;
c) Mospranimin e ankimit.
3. Nëse Komisioni merr vendim sipas shkronjës “b”, të pikës 2, të këtij kreu, vazhdon me shqyrtimin e ankimit brenda së njëjtës mbledhje. Komisioni duhet të përfundojë shqyrtimin administrativ dhe të marrë vendimin, brenda 30 (tridhjetë) ditëve nga regjistrimi i ankesës në Inspektoratin e Përgjithshëm.
4. Afati për shqyrtimin e ankimit administrativ, sipas pikës 3, të këtij kreu, mund të shtyhet vetëm një herë, brenda një afati të ri 30-ditor, në rast të kompleksitetit të çështjes, sipas parashikimeve në Kodin e Procedurave Administrative.
5. Komisioni shqyrton ankimin administrativ në prani të subjektit të inspektimit, përfaqësuesit ligjor të tij ose një personi të autorizuar me dokumentacionin përkatës ligjor nga subjekti i inspektimit.
6. Në përfundim të procesit të shqyrtimit të ankimit administrativ dhe pasi të gjithë anëtarët kanë shprehur mendimin e tyre mbi çështjen, kryetari i komisionit deklaron mbylljen e shqyrtimit administrativ të ankimit dhe fton anëtarët që të votojnë.
7. Secili anëtar ka të drejtën e një vote dhe abstenimi nga votimi nuk lejohet për asnjë anëtar të Komisionit.
8. Vendimet në Komision merren me shumicën e votave, nëpërmjet votimit të hapur pa praninë e subjektit ose përfaqësuesit të tij.
9. Në përfundim të procesit, Komisioni merr një nga vendimet e mëposhtme:
a) Lënien në fuqi të aktit administrativ, duke argumentuar zbatimin e drejtë të procedurave dhe ligjshmërinë në veprimet apo mosveprimet, për të cilat ankimuesi ka pretenduar shkelje;
b) Shfuqizimin e aktit administrativ (vendimit të dënimit kryesor dhe atij plotësues nëse ka), duke argumentuar shkeljet e konstatuara në zbatimin e ligjit për inspektimin dhe ligjit të posaçëm, duke treguar masat përkatëse për shfuqizimin e tyre dhe rivendosjen e ligjshmërisë në veprimet e Inspektoratit Qendror;
c) Ndryshimin e vendimit, duke argumentuar, sipas rastit, shkeljen e konstatuar në zbatim të ligjit për inspektimin dhe ligjit për marrjen e kundërvajtjes administrative.
10. Mendimi i anëtarit të mbetur në pakicë, i argumentuar, i bashkëlidhet vendimit.
11. Kur konstatohen gabime materiale në një vendim të Komisionit të Shqyrtimit të Ankimit, komisioni kryesisht apo me kërkesë bën ndreqjen e gabimit. Komisioni për korrigjimin e gabimit material zhvillon mbledhjen në praninë e subjektit të inspektimit, i cili njoftohet paraprakisht. Komisioni merr vendim të arsyetuar për ndreqje të gabimit, sipas procedurave të parashikuara në Kodin e Procedurave Administrative, i cili duhet të shprehë arsyet e korrigjimit të gabimit dhe bazën ligjore. Në përfundim, subjekti njoftohet për vendimin e korrigjuar brenda 3 (tri) ditëve nga marrja e vendimit.
12. Për çdo mbledhje të komisionit, procesverbali përmban një përmbledhje të parashtrimeve në mbledhje, datën dhe vendin e mbledhjes, anëtarët që morën pjesë, pjesëmarrjen e subjektit që ka paraqitur ankimin administrativ apo përfaqësuesin, çështjet që u diskutuan, arsyet e votimit pro ose kundër, vendimet që u morën, si dhe formën e rezultatin përfundimtar të vendimit.
13. Vendimi i komisionit përmban numrin, datën, nënshkrimin, anëtarët e pranishëm në mbledhje, relatorin e çështjes, si dhe votimin kundër.
14. I gjithë dokumentacioni i krijuar gjatë procedurës së shqyrtimit të ankimit administrativ arkivohet sipas rregullave të përcaktuara në legjislacionin për arkivin.
VI. DISPOZITA TË FUNDIT DHE KALIMTARE
1. Ngarkohen institucionet e përcaktuara në pikën 1, të këtij kreu, të caktojnë përfaqësuesit e tyre për të qenë pjesë e komisionit të shqyrtimit të ankimit, brenda 10 (dhjetë) ditëve nga hyrja në fuqi e këtij vendimi.
2. Ngarkohen Inspektorati i Përgjithshëm, ministritë e linjës, inspektoratet qendrore dhe strukturat e tjera përgjegjëse për inspektimin për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA SHTESA DHE NDRYSHIME NË VENDIMIN NR.1085, DATË 24.12.2020, TË KËSHILLIT TË MINISTRAVE, “PËR PËRCAKTIMIN E RREGULLAVE PËR LIDHJEN E KONTRATAVE PËR BLERJEN E PAJISJEVE/MJETEVE TË PROJEKTUARA POSAÇËRISHT OSE TË PËRSHTATURA PËR QËLLIME USHTARAKE, SI DHE ARMËT, MUNICIONET APO MATERIALET LUFTARAKE PËR QËLLIME OPERACIONALE, PËRFSHIRË TEKNOLOGJINË DHE SOFTWARE-T E LIDHURA ME KËTO MALLRA, SI DHE PËR PËRBËRJEN, MËNYRËN E ORGANIZIMIT E TË FUNKSIONIMIT TË KOMISIONIT ]TË VEÇANTË TË KLASIFIKIMIT TË KËTYRE KONTRATAVE”
Në mbështetje të nenit 100 të Kushtetutës dhe të pikave 1, shkronjat “dh” e “i”, dhe 2, të nenit 5, të ligjit nr.36/2020, “Për prokurimet në fushën e mbrojtjes dhe të sigurisë”, me propozimin e ministrit të Mbrojtjes, Këshilli i Ministrave
V E N D O S I:
I. Në vendimin nr.1085, datë 24.12.2020, të Këshillit të Ministrave, “Për përcaktimin e rregullave për lidhjen e kontratave për blerjen e pajisjeve/mjeteve të projektuara posaçërisht ose të përshtatura për qëllime ushtarake, si dhe armët, municionet apo materialet luftarake për qëllime operacionale, përfshirë teknologjinë dhe software-t e lidhura me këto mallra, si dhe për përbërjen, mënyrën e organizimit e të funksionimit të komisionit të veçantë të klasifikimit të këtyre kontratave”, bëhen këto shtesa dhe ndryshime:
1. Në titull, pas fjalës “… përfshirë …” shtohet “… shërbimet, …”.
2. Në të gjithë tekstin e vendimit, pas fjalëve “agjenci/a/së/e/ve/të/në e/të NATO-s” dhe “agjencisë së saj” shtohen “ose vend/e partner/e i/të Republikës së Shqipërisë dhe/ose të NATO-s ose agjenci e/të tij/tyre.”.
3. Në shkronjën “a”, të nenit 1, pas fjalës “… përfshirë …” shtohet “… shërbimet, …”.
4. Në nenin 2 bëhen këto shtesa dhe ndryshime:
a) Në fund të pikës 1 shtohen fjalët “… ose struktura varësie apo shoqëri aksionare shtetërore, që ushtrojnë veprimtarinë në fushën e industrisë ushtarake të autorizuara nga Ministria e Mbrojtjes.”;
b) Në shkronjën “c”, të pikës 4, fjalët “… ndërmarrjet ushtarake …” zëvendësohen me “… dhe …”;
c) Pas pikës 21 shtohet pika 21.1, me këtë përmbajtje:
“21.1. “Dialogu negociues” është procedura, përmes së cilës autoriteti kontraktor kryen dialog me shoqërinë aksionare me kapital shtetëror, mbi mundësinë e realizimit të një kontrate me këtë subjekt.”.
5. Në nenin 6, pas fjalës “… përfshirë …” shtohet “… shërbimeve, …”
6. Në shkronjën “c”, të pikës 6, të nenit 8, pas fjalës “… projektit …” shtohen fjalët “… duke iu përmbajtur dhe përditësuar specifikimet teknike, parashikuar në kërkesën operacionale …”.
7. Në pikën 1, të nenit 10, fjalët “… ministrit të Mbrojtjes …” zëvendësohen me “… titullarit të autoritetit kontraktor …”.
8. Në pikën 1, të nenit 11, fjalët “… ministrit të Mbrojtjes …” zëvendësohen me “… titullarit të autoritetit kontraktor …”.
9. Pas nenit 16 shtohet neni 16/1, me këtë përmbajtje:
“Neni 16/1
Arsyet/kriteret e shkualifikimit të kandidatëve ose të ofertuesve
1. Autoriteti kontraktor shkualifikon nga procedura e përzgjedhjes së fituesve të kontratave për prokurime, që zhvillohen sipas këtij vendimi, çdo operator ekonomik, kur ka të dhëna se ai është ose ka qenë i dënuar me vendim penal të formës së prerë për ndonjë nga veprat e mëposhtme:
a) Pjesëmarrje në grup të strukturuar kriminal, organizatë kriminale, bandë e armatosur, organizatë terroriste;
b) Korrupsion;
c) Mashtrim;
ç) Pastrim parash ose financim i terrorizmit;
d) Vepra me qëllime terroriste, vepra penale të lidhura me veprimtari terroriste, nxitje, ndihmë ose mbështetje për kryerjen e veprave penale me qëllime terroriste;
dh) Organizim, drejtim ose financim i veprimtarisë së prodhimit e shitjes së narkotikëve dhe i veprimtarisë së trafikimit të narkotikëve;
e) Falsifikim;
ë) Keqtrajtim i të miturve, sipas nenit 124/b të Kodit Penal, dhe forma të tjera të trafikimit të qenieve njerëzore.
2. Detyrimi për të shkualifikuar një operator ekonomik zbatohet edhe kur personi i dënuar me një vendim të formës së prerë ose bashkëshorti/bashkëshortja është anëtar i një organi administrativ, drejtues ose mbikëqyrës i tij, aksionar ose ortak i operatorit ekonomik apo ka kompetenca përfaqësuese vendimmarrjeje ose kontrolluese brenda tij.
3. Autoriteti kontraktor shkualifikon nga procedura e përzgjedhjes së fituesve të kontratave për prokurime, që zhvillohen sipas këtij vendimi, çdo operator ekonomik, nëse:
a) ka falimentuar apo është në likuidim, punët/çështjet e tij po administrohen nga një gjykatë, ka bërë marrëveshje me kreditorë, ka pezulluar aktivitetet e biznesit ose është në një situatë të ngjashme, të ardhur si pasojë e një procedure të ngjashme, sipas legjislacionit në fuqi;
b) është subjekt i procedimeve për deklarimin e falimentimit, për një urdhër likuidimi apo administrimi të detyrueshëm nga një gjykatë apo një rregullimi me kreditorë apo ndonjë procedimi të ngjashëm, sipas legjislacionit në fuqi;
c) nuk ka përmbushur detyrimet e tij në lidhje me pagesën e kontributeve të sigurimeve shoqërore, në përputhje me legjislacionin shqiptar ose me dispozitat e zbatueshme në shtetin e origjinës;
ç) nuk ka përmbushur detyrimet në lidhje me pagimin e tatimeve, në përputhje me legjislacionin shqiptar ose me dispozitat e zbatueshme në shtetin e origjinës.
4. Autoriteti kontraktor shkualifikon nga procedura e përzgjedhjes së fituesve të kontratave për prokurime, që zhvillohen sipas këtij vendimi, çdo operator ekonomik, nëse ai apo edhe përfaqësuesi i tij ligjor, pronari, aksionarët e tij janë gjetur, mbi bazën e provave apo të informacioneve të vërtetuara, duke përfshirë edhe ato të përfituara nga burimet e mbrojtura me ligj, se përbëjnë rrezik të papranueshëm sigurie.
5. Autoriteti kontraktor mund të përcaktojë, rast pas rasti, kritere të tjera për kualifikimin e kandidatëve ose të ofertuesve, në varësi të natyrës së procedurës së prokurimit.
6. Arsyet e shkualifikimit të kandidatëve ose të ofertuesve listohen në njoftimin e kontratës që publikohet.”.
10. Në pikën 3, të nenit 17, bëhen këto shtesa dhe ndryshime:
a) Në shkronjën “a”, pas fjalës “… financiare.” shtohen fjalët “… në një vlerë jo më të madhe se 50% e vlerës së përllogaritur të kontratës, që prokurohet dhe që është realizuar gjatë tri viteve të fundit.”;
b) Në shkronjën “b”, pas togfjalëshit “… xhiros vjetore …” shtohen fjalët “…. , vlera e të cilave nuk mund të tejkalojë 50 % të vlerës limit të kontratës që prokurohet, …”;
c) Në shkronjën “c”, pas fjalës “… procedurave.” shtohen fjalët “… dhe të argumentuara nga autoriteti kontraktor në një procesverbal të veçantë.”.
11. Pas pikës 3, të nenit 18, shtohet pika 4, me këtë përmbajtje:
“4. Dialogu negociues.”.
12. Pas shkronjës “e”, të pikës 2, të nenit 20, shtohet shkronja “ë”, me këtë përmbajtje:
“ë) Kur ka një vendimmarrje të Komitetit të Mbrojtjes dhe Sigurisë mbi një projekt specifik.”.
13. Neni 21 ndryshohet, si më poshtë vijon:
“Neni 21
Procedura “shtet me shtet”
1. Procedura “shtet me shtet” realizohet për:
a) furnizimin me pajisje ushtarake ose pajisje të klasifikuara;
b) punë dhe shërbime, që lidhen drejtpërdrejt me këto pajisje;
c) punë dhe shërbime të posaçme për qëllime ushtarake ose punë dhe shërbime, që, për arsye sigurie, përfshijnë, kërkojnë dhe/ose përmbajnë informacion të klasifikuar.
2. Procedurat “shtet me shtet” mund të realizohen në një nga format e mëposhtme:
a) Drejtpërdrejt me një vend anëtar të NATO-s ose me një agjenci të NATO-s;
b) Nëpërmjet dhënies së autorizimit një vendi anëtar të NATO-s ose agjencie të NATO-s për të kryer procedurat e prokurimit, nëpërmjet marrëveshjeve teknike ose nëpërmjet një kërkese të veçantë për prokurim;
c) Drejtpërdrejt ose nëpërmjet dhënies së autorizimit me një vend partner të NATO-s ose një agjencie të tyre nëpërmjet ose bazuar në një marrëveshje qeveritare;
ç) Drejtpërdrejt ose nëpërmjet dhënies së autorizimit me vende partnere të Republikës së Shqipërisë ose një agjencie të tyre, pas miratimit paraprak të Komitetit të Mbrojtjes dhe Sigurisë, nëpërmjet ose bazuar në një marrëveshje qeveritare.
3. Procedura e drejtpërdrejtë me vendin ose agjencinë, sipas përkufizimeve në këtë vendim, është procedura, përmes së cilës autoriteti kontraktor prokuron mallra dhe shërbime nga ose nëpërmjet këtyre institucioneve, me kushtet, çmimet e standardet, që ato zbatojnë për forcat e tyre të armatosura.
4. Procedura me dhënie autorizimi njërit prej institucioneve të cituara në këtë vendim është procedura përmes së cilës autoriteti kontraktor autorizon një nga institucionet në fjalë për të realizuar prokurimin në interes të Forcave të Armatosura, me procedurën, kushtet, çmimet e standardet, që ato zbatojnë për forcat e tyre të armatosura. Në këtë rast, autoriteti kontraktor mund të transferojë paraprakisht fondin financiar te shteti përkatës ose agjencia përkatëse, pas autorizimit të marrë nga ministria përgjegjëse për financat.
5. Procedurat “shtet me shtet” mund të bëhen me kontrata njëvjeçare ose kontrata disavjeçare.
6. Procedura e prokurimit “shtet me shtet” përfshin nënshkrimin e marrëveshjes teknike ose, në mungesë të saj, dërgimin e kërkesës së veçantë vendit/agjencisë përkatëse, të cilave u delegohet realizimi i procedurës së prokurimit, sipas sistemit të tyre të prokurimit. Ky lloj prokurimi mund të realizohet në këto raste:
a) Në rastin e ekzistencës së një marrëveshjeje bashkëpunimi ndërmjet shteteve për një fushë/objekt të caktuar, në kuadër të sigurisë dhe mbrojtjes;
b) Kur testimi i mallit të caktuar kërkon analizë teknike komplekse dhe Forcat e Armatosura nuk kanë mundësi ta kryejnë atë;
c) Në rastet e mospasjes së një ekspertize të mjaftueshme/nevojshme për objektin e prokurimit;
ç) Kur një formë tjetër prokurimi e përcaktuar në këtë vendim ka dështuar ose ka argumente të qëndrueshme, që dëshmojnë për mungesë leverdie, për shkak të çmimit ose të cilësisë së dobët së mallit;
d) Kur ekzistojnë kontrata të mëparshme të kësaj kategorie, prokurime “shtet me shtet” dhe ajo vlerësohet më e leverdisshme sesa blerja e drejtpërdrejtë te një subjekt ekonomik, që operon me këtë shtet ose me shtete të tjera;
dh) Kur ka një nevojë urgjente, për shkaqe jashtë kontrollit apo të parashikimit të autoritetit kontraktor, që kanë të bëjnë me fatkeqësi natyrore ose fatkeqësi të tjera, dhe kur afati kohor limit për procedura të konkurrimit nuk mund të realizohet dhe ekzistojnë rrethana të besueshme. Rrethanat e krijuara, në asnjë rast, nuk duhet të përdoren për investimet komplekse, të cilat zgjasin më shumë se një vit buxhetor;
e) Në raste urgjencash, kur cenohet niveli i gatishmërisë dhe operacionalitetit të strukturave të Forcave të Armatosura;
ë) Kur nuk mund të gjenden operatorë ekonomikë në treg;
f) Kur shteti/agjencia përkatëse përballon një pjesë të mallit ose shërbimit në vlerë monetare ose në natyrë, por jo më pak se 15% e vlerës totale të mallit ose të shërbimit, që kërkohet të prokurohet.
7. Në procedurën “shtet me shtet” autoriteti kontraktor ndjek këta hapa:
a) Pas hartimit të kërkesës operacionale nga struktura gjeneruese dhe të klasifikimit të saj nga komisioni i veçantë i klasifikimit, struktura përgjegjëse pranë autoritetit kontraktor, nëpërmjet grupit të punës për hartimin e projektit, harton projektin teknik me të gjithë informacionin e mundshëm, duke përcaktuar kërkesa sa më të plota e të sakta tekniko-operacionale;
b) Projekti teknik dhe rekomandimi për llojin e procedurës “shtet me shtet” i dërgohen titullarit të autoritetit kontraktor për miratim;
c) Me miratimin nga titullari, struktura përgjegjëse pranë autoritetit kontraktor i drejtohet vendit ose agjencisë së saj dhe negocion me të kushtet e projektit, ku përcaktohen edhe afatet e dërgimit nga kjo e fundit të ofertës teknike dhe ekonomike;
ç) Autoriteti kontraktor e vlerëson këtë ofertë dhe vendos nëse do të vijojë apo jo me nënshkrimin e saj.”.
14. Pas nenit 21 shtohen nenet 21/1 dhe neni 21/2, me këtë përmbajtje:
“Neni 21/1
Rastet e mundshme të autorizimit të shoqërive aksionare me kapital shtetëror për furnizimin e Forcave të Armatosura me armë, municione, pajisje dhe teknologji ushtarake
1. Ministria e Mbrojtjes rakordon me shoqërinë aksionare me kapital shtetëror mbi mundësinë e plotësimit të nevojave të Forcave të Armatosurave, sipas kërkesave operacionale brenda fushës së veprimtarisë së saj apo mbi bazën e një informacioni të vënë në dispozicion nga kjo shoqëri.
2. Në rastet kur shoqëria me kapital shtetëror disponon të paktën 50% të kapaciteteve të vlerësuara si të nevojshme për realizimin e objektit të kontratës në fjalë ose zotëron shumicën e kapitalit të nënshkruar të subjektit, që është krijuar për këtë qëllim, Ministria e Mbrojtjes mund të blejë drejtpërdrejt nga shoqëria në fjalë produktet e prodhuara nga ajo apo nëpërmjet saj, sipas një projekti të hartuar nga struktura përgjegjëse për modernizimin, mbi bazën e kërkesës operacionale dhe vendimit të KVK-së.
3. Në rastet kur shoqëria me kapital shtetëror disponon më pak se 50% të kapaciteteve të vlerësuara si të nevojshme për realizimin e objektit të kontratës në fjalë ose nuk zotëron shumicën e kapitalit të nënshkruar të subjektit, që është krijuar për këtë qëllim, Ministria e Mbrojtjes mund të autorizojë drejtpërdrejt këtë të fundit për nisjen e procedurave për realizimin e objektit të kontratës, me produktet e prodhuara nga ajo apo nëpërmjet saj, vetëm pasi Komiteti i Mbrojtjes dhe Sigurisë ka aprovuar për rastin në fjalë detyrimin për furnizimin e Forcave të Armatosurave nëpërmjet shoqërisë aksionare me kapital shtetëror.
4. Edhe për rastet kur objekti i kontratës do të sigurohet nëpërmjet shoqërisë aksionare me kapital shtetëror apo të subjektit, që është krijuar për këtë qëllim, projekti teknik hartohet nga struktura përgjegjëse për modernizimin, sipas kërkesës operacionale dhe vendimit të KVK-së, miratohet nga titullari i autoritetit kontraktor në Ministrinë e Mbrojtjes, dhe, mbi bazën e këtij projekti, kryhen negociatat me shoqërinë në fjalë, nëse është rasti.
5. Mënyra e pagesës, përfshirë parapagimin (total apo pjesor), nëse është rasti, apo vënia e fondeve në dispozicion të furnizuesit nga ana e Ministrisë së Mbrojtjes janë pjesë e negociatave dhe pasqyrohet në kontratë.
Neni 21/2
Dialogu negociues
1. Nëse nuk ka një autorizim të drejtpërdrejtë sipas nenit 21/1, Ministria e Mbrojtjes kryen dialog negociues me shoqërinë aksionare shtetërore për të gjitha llojet e veprimtarisë që kjo shoqëri mund të realizojë sipas legjislacionit të fushës përkatëse, për të cilat kjo shoqëri disponon apo mund të sigurojë kapacitetet e nevojshme, në kohën kur kërkohet realizimi i kontratës përkatëse.
2. Struktura përgjegjëse për modernizimin i drejtohet shoqërisë aksionare shtetërore për çmim dhe disponueshmëri për objektin konkret, duke i përcaktuar afatin brenda së cilës kjo e fundit duhet të shprehet mbi kërkesën në fjalë.
3. Për raste të argumentuara, pas marrjes së çmimit dhe disponueshmërisë nga shoqëria në fjalë, struktura përgjegjëse për modernizimin mund të kryejë analizë krahasuese, nëse disponon apo mund të sigurojë në kohë informacion mbi mundësinë e realizimit të kontratave nga subjekte të tjera, që operojnë në fushën përkatëse, duke u dërguar edhe këtyre të fundit kërkesë për çmim dhe disponueshmëri.
Nëse në përfundim të analizës krahasuese rezulton si variant më i favorshëm ai me shoqërinë aksionare shtetërore, struktura përgjegjëse për modernizimin njofton subjektet e tjera mbi këtë vendimmarrje dhe vazhdohet me negociimin e kontratës me shoqërinë përkatëse.
4. Në përfundim të analizës krahasuese, struktura përgjegjëse për modernizimin mund të vendosë të mos kalojë në fazën e negociimit të kontratës me shoqërinë aksionare shtetërore, por të ftojë këtë të fundit si një ndër ofertuesit e procedurës konkurruese.
5. Shoqëria aksionare shtetërore, në rastin e pjesëmarrjes si ofertues në procedurën konkurruese, nuk ka detyrimin e paraqitjes së dokumentacionit mbi kapacitetet ligjore, financiare dhe/ose teknike, pasi kjo fazë konsiderohet e tejkaluar në kohën kur është përfshirë në listën e ofertuesve të mundshëm.
Gjithashtu, në këto raste, autoriteti kontraktor mund të parashikojë kritere vlerësimi, që kanë të bëjnë me elemente të veçanta, që mund të sjellë përzgjedhja e shoqërisë aksionare shtetërore si furnizues i Ministrisë së Mbrojtjes (punësimin e parashikuar, të ardhura të kthyera apo dhe çdo të mirë të pritshme, që vlerësohen rast pas rasti nisur nga natyra e objektit të prokurimit).
Në rastet kur shoqëria aksionare shtetërore merr pjesë në një procedurë prokurimi, në bashkëpunim me subjekte të tjera, pavarësisht formës së bashkëpunimit ndërmjet tyre, subjekti/subjektet bashkëpunuese duhet të plotësojnë çdo kërkesë apo kriter, që u kërkohet edhe ofertuesve të tjerë, në përputhje dhe në përpjesëtim me përqindjen dhe/ose natyrën e pjesëmarrjes në shërbim apo furnizim, sipas aktmarrëveshjes përkatëse.”.
15. Pas nenit 28 shtohet neni 28/1, me këtë përmbajtje:
“Neni 28/1
Bashkimi i operatorëve ekonomikë
1. Oferta mund të paraqitet nga një bashkim operatorësh ekonomikë, ku njëri prej tyre i përfaqëson të tjerët gjatë procedurës dhe, në rast përzgjedhjeje, edhe gjatë zbatimit të kontratës. Në dhënien e çmimit dhe të disponueshmërisë, operatori ekonomik, të cilit i është drejtuar autoriteti kontraktor, duhet të informojë për qëllimin për të marrë pjesë si bashkim operatorësh në procedurën në fjalë.
Në dhënien e çmimit dhe të disponueshmërisë e në vijim edhe në ofertë duhet të përcaktohet pjesa e shërbimit ose e furnizimit, që do të kryejë secili nga anëtarët e këtij bashkimi.
2. Secili prej anëtarëve të këtij bashkimi duhet të përmbushë kërkesat ligjore të parashikuara të këtij vendimi dhe ato të përcaktuara në dokumentet e tenderit. Kërkesat ekonomike, financiare, profesionale dhe ato teknike duhet të përmbushen nga i gjithë bashkimi, në përputhje me përqindjen e pjesëmarrjes në shërbim apo furnizim, të përcaktuara në aktmarrëveshje.
3. Operatori ekonomik, pjesëtar i një bashkimi, nuk mund të paraqesë njëkohësisht edhe oferta individuale. Bashkimi i operatorëve ekonomikë nuk ndryshon pas dorëzimit të ofertës, në të kundërt oferta e tij refuzohet.
4. Në rast falimentimi të përfaqësuesit të bashkimit të operatorëve ekonomikë ose në rrethana të tjera, që ndërpresin veprimtarinë e tij gjatë zbatimit të kontratës, autoriteti kontraktor mund të vazhdojë kontratën me një operator tjetër ekonomik, anëtar të bashkimit, me kusht që ai të zotërojë kapacitetet ligjore, ekonomike, financiare dhe teknike për të zbatuar kontratën. Përndryshe, autoriteti kontraktor zgjidh kontratën. Në rast se këto rrethana i ndodhin operatorit tjetër ekonomik, atëherë detyrimet e operatorit të dështuar ekonomik mund të merren përsipër nga përfaqësuesi ose nga një anëtar tjetër i bashkimit, me kusht që ky të plotësojë kërkesat.”.
16. Në nenin 31 bëhen këto ndryshime dhe shtesa:
a) Në pikën 2, fjalët “… brenda 5 ditëve punë nga data …” zëvendësohen me “… brenda 10 (dhjetë) ditëve kalendarike nga dita e nesërme e punës …”;
b) Pas pikës 5 shtohet pika 5.1, me këtë përmbajtje:
“5.1. Anëtarët e komisionit/zyrtari i ngarkuar nuk duhet të kenë marrë pjesë në marrjen e vendimit, për të cilin është paraqitur ankesa.”.
17. Pika 2, e nenit 33, ndryshohet, si më poshtë vijon:
“2. Zbatimi dhe mbikëqyrja e kontratës realizohet nga struktura përgjegjëse për modernizimin, e cila mund të përfshijë në grupin e punës të ngritur për këtë qëllim edhe përfaqësues të strukturës, që ka përgatitur kërkesën operacionale. Ky grup vlerëson realizimin e detyrimeve kontraktore, sipas fazave të realizimit të kontratës dhe përgatit raportin përkatës për fazën, në të cilën është zbatimi i kontratës.”.
18. Neni 34, ndryshohet si më poshtë vijon:
“Neni 34
Organizimi dhe funksionimi i KVK-së
Komisioni i veçantë i klasifikimit (në vijim, KVK) organizohet dhe funksionon si një strukturë e posaçme në Ministrinë e Mbrojtjes, me qëllim klasifikimin ose jo të kërkesave operacionale, të hartuara nga strukturat gjeneruese, si kërkesa për kontrata për blerjen e pajisjeve/mjeteve të projektuara posaçërisht ose të përshtatura për qëllime ushtarake, si dhe armët, municionet apo materialet luftarake për qëllime operacionale, përfshirë shërbimet, teknologjinë dhe software-t e lidhura me këto mallra.”.
19. Pas pikës 2, të nenit 36, shtohet pika 3, me këtë përmbajtje:
“3. Anëtarët e KVK-së asistohen në veprimtarinë e tyre në kuadër të këtij komisioni nga specialistë sipas fushave përkatëse.”.
20. Në nenin 37 bëhen këto shtesa dhe ndryshime:
a) Në fund të pikës 6 shtohen fjalët “… ose personi i autorizuar prej tij.”.
b) Në pikën 12 bëhen këto ndryshime dhe shtesa:
i. Fjala “… “kontrata …” zëvendësohet me fjalët “… “kërkesa operacionale …”;
ii. Pas fjalës “… përfshirë …” shtohet “… shërbimet, …”.
II. Ngarkohet Ministria e Mbrojtjes për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E PËRSHKRIMEVE DHE TË SPECIFIKIMEVE TEKNIKE TË UDHRAVE DHE MEDALJEVE, SI DHE TË CERTIFIKATAVE E LETRAVE NJOFTUESE PËR DORËZIMIN E TYRE
Në mbështetje të nenit 100 të Kushtetutës dhe të nenit 19, të ligjit nr.93/2022, “Për dekoratat në Republikën e Shqipërisë”, me propozimin e Kryeministrit, Këshilli i Ministrave
V E N D O S I:
1. Miratimin e përshkrimeve dhe të specifikimeve teknike të urdhrave dhe medaljeve, si dhe të certifikatave e letrave njoftuese për dorëzimin e tyre, sipas lidhjeve 1, 2, 3 dhe 4, që i bashkëlidhen këtij vendimi.
2. Ngarkohen Kancelaria e Urdhrave dhe Medaljeve, Ministria e Mbrojtjes dhe Ministria e Brendshme për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU